ផលិតផលថ្នាំជក់ទាំងអស់ត្រូវបោះពុម្ពសារព្រមានសុខភាពជាភាសាខ្មែរ និងរូបភាពឲ្យបានមុនដំណាច់ខែកក្កដា ឆ្នាំ២០១៦
សារព័ត៌មាន Cambodia News/
ភ្នំពេញ (២៨ ឧសភា ២០១៦) ៖ គ្រប់ឧស្សាហករថ្នាំជក់ និងអ្នកនាំចូលផលិតផលថ្នាំជក់ទាំងអស់ត្រូវបោះពុម្ពសារព្រមានសុខ ភាពជាភាសាខ្មែរ និងរូបភាពឲ្យបានមុនដំណាច់ខែកក្កដា២០១៦ បើមិនដូច្នោះទេបុគ្គលដែលល្មើសនឹងត្រូវពិន័យជាប្រាក់៤លានរៀល ចំណែកអ្នកចែកចាយនិងលក់ដុំត្រូវពិន័យជាប្រាក់២លានរៀល ឯអ្នកលក់រាយវិញក៏ត្រូវពិន័យជាប្រាក់១លានរៀលផងដែរ ។
នេះ បើតាមការឲ្យដឹងពីលោកវេជ្ជបណ្ឌិត មុំ គង់ នាយកប្រតិបត្តិ អង្គសុខាភាពដើម្បីកម្ពុជានៅក្នុងសន្និសីទសារព័ត៌ មានស្តីពីការអនុវត្តមាត្រា១១នៃអនុសញ្ញា ស្តីពីការត្រួតពិនិត្យថ្នាំជក់នៅសណ្ឋាគារសាន់វ៉េ កាលពីថ្ងៃទី២៦ឧសភា។
លោក វេជ្ជបណ្ឌិតបន្តថា ដើម្បីឲ្យពលរដ្ឋកម្ពុជា យល់ដឹងបានច្បាស់អំពីគ្រោះថ្នាក់ក៏ដូចជាភាពជាក់ស្ដែងនៃជំងឺ ដែលកើតឡើងដោយសារការប្រើប្រាស់ថ្នាំជក់នេះ រាជរដ្ឋាភិបាលបានអនុម័តនូវអនុក្រឹត្យ ស្ដីពីការ បោះពុម្ពសារព្រមានសុខភាពជាភាសាខ្មែរ និងជារូបភាពលើកញ្ចប់ផលិតផលថ្នាំជក់ ។
សូមបញ្ជាក់ថា បច្ចុប្បន្ននៅលើពិភពលោក មានអ្នកស្លាប់ដោយសារផលិតផលថ្នាំជក់ចំនួន៦លាននាក់ក្នុង១ឆ្នាំ ដោយឡែកកម្ពុជាមាន១ម៉ឺននាក់ក្នុង១ឆ្នាំ បើគិតជាមធ្យមមាន៣០នាក់បានស្លាប់ក្នុង១ថ្ងៃ ៕
