ប្រឡងបាក់ឌុបឆ្នាំនេះនឹងរឹតបន្ដឹងបន្ថែមទៀតជាងឆ្នាំមុនៗ

សារព័ត៌មាន​ Cambodia News/

ភ្នំពេញ ៖ លោក ហង់ ជួនណារ៉ុន រដ្ឋមន្ត្រីក្រសួងអប់រំយុវជន និងកីឡា បានថ្លែងថា ការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំសិក្សា២០១៧-២០១៨នេះ ក្រសួងអប់រំនឹងរឹតបន្តឹងឲ្យខ្លាំងជាងឆ្នាំកន្លងទៅថែមទៀត ជាមួយនឹងអ្នកសង្កេតការណ៍របស់ អង្គភាពប្រឆាំងអំពើពុករលួចជាង៦ពាន់នាក់ និងខណៈមេប្រយោគជាង៣ម៉ឺននាក់។

លោករដ្ឋមន្រ្តីថ្លែងបែបនេះឡើង​ក្នុង​សន្និសីទ​សារព័ត៌មាន​ស្តីពី​ការ​រៀបចំ​ប្រឡង​សញ្ញាបត្រ​មធ្យម​សិក្សាទុតិយភូមិ សម័យ​ប្រឡង ២០ សីហា ២០១៨ នៅ​មជ្ឈមណ្ឌល​ជាតិ​ហ្វឹកហ្វឺន​កីឡា នា​រសៀល​ថ្ងៃ២ ខែ​កក្កដា ឆ្នាំ​២០១៨​នេះ។

លោក ហង់ ជួនណារ៉ុន បានបញ្ជាក់ថា ប្រឡងបាក់ឌុបឆ្នាំនេះ គឺមានការរឹតបន្តឹងចាប់ពីក្រៅមណ្ឌលប្រឡង ដល់ក្នុងមណ្ឌលប្រឡង ដោយមិនអនុញ្ញាតឲ្យបេក្ខជនយកសំណៅឯកសារ ទូរស័ព្ទ និងឧបករណ៍អេឡិចត្រូនិចមួយចំនួនទៀត ចូលមណ្ឌលប្រឡងឡើយ ប្រសិនរកឃើញបេក្ខជនអាចនឹងបានពិន្ទុសូន្យ។ ប្រសិនបើបេក្ខជនទទួលបានពិន្ទុសូន្យមួយមុខវិជ្ជា មានន័យថា គឺធ្លាក់ដោយស្វ័យប្រវត្តិតែម្តង។

លោកបន្តថា ប្រសិនបេក្ខជនយកសំណៅឯកសារ សៀវភៅ ទូរស័ព្ទដៃ ប្រើប្រាស់ពាក្យសំដីមិនសមរម្យបង្កជម្លោះ ក្នុងមណ្ឌលប្រឡង គឺក្រសួងតម្រូវឲ្យបេក្ខជនធ្លាក់ដោយស្វ័យប្រវត្តិ។ ទន្ទឹមនោះលោករដ្ឋមន្ត្រីក៏បានអំពាវនាវ ដល់បេក្ខជនដែលត្រូវប្រឡងទាំងអស់ ត្រូវគោរពវិន័យប្រឡង៕