ពៅ បញ្ញាពេជ្រ ជំងឺធ្វើទុក្ខខ្លាំងប្រកាសរកជំនួយ
Cambodia News
ហេង នាង
ភ្នំពេញ៖ នៅលើទំព័របណ្តាញទំនាក់ទំនងសង្គមហ្វេសប៊ុករបស់ តារាចម្រៀង ពៅ បញ្ញាពេជ្របានបង្ហោះវីដេអូក្លីប រយៈពេល ២នាទី រៀបរាប់ពីស្ថានភាពមុខរបួសរបស់នាងជាមួយទុក្ខលំបាក និងការធ្វើទុក្ខទោម្មេញពីអាការជំងឺរ៉ាំរ៉ៃរបស់នាង។ការព្យាបាលដោយថ្នាំដដែលជារៀងរាល់ថ្ងៃ ធ្វើឲ្យអាការជំងឺស៊ាំនឹងថ្នាំ ធ្វើឲ្យការព្យាបាលគ្មានប្រសិទ្ធភាព ទើបនាងអំពាវនាវសុំជំនួយតាមរយៈវីដេអូក្លីបរបស់នាង ។
សារមួយនេះគឺនាងចង់បញ្ជាក់ថានាងកំពុងត្រូវការជំនួយយ៉ាងតក់ក្រហល់បំផុតសម្រាប់ទិញថ្នាំដង្កូវ និងតម្រូវការព្យាបាលឲ្យទាន់ពេលវេលា ។ នៅក្នុង Wall របស់នាង ដែលមានរូបភាពជាវីដេអូដែល បានបង្ហោះតាមបណ្តាញសង្គមហ្វេសប៊ុកនោះបានឮសម្លេង និយាយ ខ្សាវៗថា ការព្យាបាលដោយការប្រើប្រាស់ថ្នាំធម្មតានោះ លែងមានប្រសិទ្ធភាពទៀតហើយ។
ម្យ៉ាងទៀត ពេលនេះជំងឺធ្វើទុក្ខខ្លាំងមិនអាចទ្រាំបាន ទើបក្រុមគ្រួសារ ដឹកយកមកព្យាបាលនៅមន្ទីរពេទ្យខេមា ហើយចាំបាច់ត្រូវប្រើថ្នាំមានតម្លៃខ្ពស់ៗ ទើបអាចទប់ទល់នឹងស្ថានភាពជម្ងឺបាន។ ព្រោះគ្រួសារនាងអស់លទ្ឋភាពព្យាបាលហើយ ។ សំដីខ្សាវៗនៅក្នុង វីដេអូក្លីប រយៈពេល ២នាទី នាងបានបញ្ជាក់ថា នាងសុំឲ្យសប្បុរសជន និងអ្នកសិល្បៈនានា ចង់ជួយដោយក្តីអនុគ្រោះដើម្បីមានលទ្ឋភាពក្នុងការព្យាបាល។
គួររំលឹកថា តារាចម្រៀង ពៅ បញ្ញាពេជ្រ ត្រូវបានឃាតករមិនស្គាល់មុខបាញ់ប៉ងសម្លាប់កាលពីថ្ងៃទី២៣ ខែកុម្ភៈ ឆ្នាំ២០០៧ នៅខាងមុខវិទ្យាស្ថានភាសាអង់គ្លេស ELT ខាងកើតផ្សារថ្មី។ ភ្លាមៗនាងត្រូវបានក្រុមគ្រួសារបញ្ជូនទៅធ្វើការព្យាបាលនៅមន្ទីរ ពេទ្យប្រទេសវៀតណាម ព្រមទាំងបន្តទៅកាន់ប្រទេសថៃ។ ប៉ុន្តែទោះជាយ៉ាងណាក៏ដោយ អស់រយៈពេល៥ឆ្នាំកន្លងមកនេះ ស្ថានភាពរបស់តារាចម្រៀងដែលធ្លាប់មានឈ្មោះបោះសំឡេងរូបនេះមិន មានភាពប្រសើរខ្លាំងក្លានោះទេ ពោលគឺនាងគ្រាន់តែអាចអង្គុយនៅលើរទេះរុញប៉ុណ្ណោះ៕
