ក្រសួងប្រកាសថ្ងៃបិទឈ្មោះ លេខបន្ទប់ លេខតុ ប្រឡងបាក់ឌុបឆ្នាំ២០១៨ហើយ
សារព័ត៌មាន Cambodia News/
ភ្នំពេញ ៖ តាមទំព័រហ្វេសប៊ុកផ្លូវការ របស់ក្រសួងអប់រំយុវជន និងកីឡា បានបញ្ជាក់ថា បញ្ជីឈ្មោះបេក្ខជន លេខតុ លេខបន្ទប់ និងបទបញ្ញត្តិផ្សេងៗទាក់ទងនឹងការប្រឡង នឹងបិទផ្សព្វផ្សាយ តាមមណ្ឌលប្រឡង ចាប់ពីម៉ោង ៩ ព្រឹក ថ្ងៃទី១៩ ខែសីហា ឆ្នាំ២០១៨។
តាមទំព័រហ្វេសប៊ុកផ្លូវការរបស់ក្រសួងអប់រំយុវជន និងកីឡា ដដែលបានឲ្យដឹងទៀតថា ចំពោះវិញ្ញាសាប្រឡងថ្នាក់វិទ្យាសាស្ត្រ មុខវិជ្ជាជម្រើស ត្រូវជ្រើសរើសមួយមុខវិជ្ជាក្នុងចំណោមមុខវិជ្ជាភូមិវិទ្យា ប្រវត្តិវិទ្យា សីលធម៌-ពលរដ្ឋវិជ្ជា និងផែនដីនិងបរិស្ថានវិទ្យា។
សម្រាប់វិញ្ញាសាប្រឡងថ្នាក់វិទ្យាសាស្ត្រសង្គម មុខវិជ្ជាជម្រើស ត្រូវជ្រើសរើសមួយមុខវិជ្ជាក្នុងចំណោមមុខវិជ្ជា រូបវិទ្យា គីមីវិទ្យា ជីវវិទ្យា និងផែនដីនិងបរិស្ថានវិទ្យា។
សូមជម្រាបជូនថា ដំណើរការសំណេរនៃការប្រឡងសញ្ញាបត្រមធ្យមសិក្សាទុតិយភូមិ ឆ្នាំសិក្សា ២០១៧-២០១៨ ប្រព្រឹត្តទៅរយៈពេលពីរថ្ងៃ គឺថ្ងៃទី ២០-២១ ខែសីហា ឆ្នាំ២០១៨ ។ ចំពោះប្រធានវិញ្ញាសាមាន ៧មុខវិជ្ជា និងមាន ២ទម្រង់ គឺទម្រង់ចែកជូនបេក្ខជន និងទម្រង់កត់ដាក់លើក្ដារខៀន៕
