សម្ដេចតេជោ ៖ ការចូលរួមថែរក្សាសន្តិភាពដើម្បីមានឱកាសប្រារព្ធព្រះរាជពិធី អុំទូកដ៏អធិកអធម្ម
សារព័ត៌មាន Cambodia News/
ភ្នំពេញ (៣១ តុលា ២០១៧) ៖ ស្របពេលដែល ព្រះរាជពិធីបុណ្យអុំទូក នឹងចូលមកដល់ ក្នុងរយៈពេលដ៏ខ្លីខាងមុខនេះ សម្ដេចតេជោ ហ៊ុន សែននាយករដ្ឋមន្ត្រី នៃកម្ពុជាបានថ្លែងអំណរគុណ ដល់ជនរួមជាតិដែលបានចូលរួមថែរក្សាសន្តិភាពដើម្បីយើងទាំងអស់គ្នាមានឱកាសប្រារព្ឋព្រះរាជពិធី ដ៏អធិកអធម្មនេះឡើង។
សម្ដេចតេជោ បានសរសេរបញ្ជាក់ លើទំព័រហ្វេសប៊ុក នៅថ្ងៃទី៣១ តុលានេះថា “ក្នុងឆ្នាំនេះ ព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែគឺនឹងប្រារព្ឋធ្វើនៅថ្ងៃទី២-៤ ខែវិច្ឆិកាឆ្នាំ២០១៧។ ក្នុងរយៈពេល៣ថ្ងៃ នៃព្រះរាជពិធីបុណ្យអុំទូកទីក្រុងភ្នំពេញ នឹងមានប្រជាពលរដ្ឋមកពីគ្រប់ទិសទី ជាពិសេសមកពីតាមបណ្តាខេត្តនានា រួមទាំងកីឡាករប្រណាំងទូកផងដែរ។ នេះក៏ជាឱកាសដ៏វិសេសវិលសាល ដើម្បីកូនចៅយុវជនជំនាន់ក្រោយ បានស្គាល់នូវពិធីបុណ្យប្រពៃណី បស់ប្រទេសជាតិហើយទន្ទឹមនឹងនោះដែរ ទេសចរបរទេសក៏បានស្គាល់នូវវប្បធម៌ ប្រពៃណីនិងទំនៀមទម្លាប់ដ៏ល្អផូរផង់ របស់កម្ពុជាផងដែរ។ក្នុងរយៈពេល៣ថ្ងៃនៃពិធីបុណ្យអុំទូកនេះ សូមបងប្អូនប្រជាពលរដ្ឋនិងកូនក្មួយ យុវជនចូលរួមកម្សាន្តសប្បាយរីករាយ គ្រប់ៗគ្នា”។
សម្ដេចតេជោ ក៏បានជូនពរបងប្អូនប្រជាពលរដ្ឋ ដែលកំពុងធ្វើដំណើរមកកាន់រាជធានីភ្នំពេញ និងពីភ្នំពេញទៅកាន់បណ្តាខេត្តនានា សូមមានសុខសុវត្ថិភាពតាមផ្លូវគ្រប់ទីកន្លែង។
ទូកដែលចូលរួមប្រកួត ក្នុងព្រះរាជពិធី បុណ្យអុំទូក អកអំបុកនិងសំពះព្រះខែដែលប្រព្រឹត្តឡើងចាប់ពីថ្ងៃទី២ដល់ថ្ងៃទី៤វិច្ឆិកាខាងមុខ មានចំនួន ២៧០ទូកខណៈ ប្រទីបមាន១៣ ៕
