សម្ដេច ស ខេង ជម្រុញម្លាំងនគរបាលធ្វើយ៉ាងណាឲ្យគ្រប់ភូមិ-ឃុំ មានសុវត្ថិភាព
សារព័ត៌មាន Cambodia News/
ភ្នំពេញ (១៦ ឧសភា ២០១៧) ៖ ថ្ងៃទី១៦ ឧសភានេះ គឺជាខួបអនុស្សាវរីយ៍លើកទី៧២ នៃថ្ងៃបង្កើតកងកម្លាំងនគរបាលជាតិ ជាមួយគ្នាសម្ដេចក្រឡាហោម ស ខេង រដ្ឋមន្ត្រីក្រសួងមហាផ្ទៃ បានដាក់ការជម្រុញនដល់កងម្លាំងនគរបាលទាំងអស់ ធានាធ្វើយ៉ាងណា ឲ្យគ្រប់ភូមិ-ឃុំមានសុវត្ថិភាព ។
សម្ដេចបានលើកឡើងនៅក្នុងសារមួយដែលត្រូវបានគេធ្វើការផ្សព្វផ្សាយជាសាធារណៈកាលពីម្សិលមិញថា ពលរដ្ឋនៅតែតម្រូវឲ្យកងកម្លាំងនគរបាលជាតិខិតខំបន្តទៀត ក្នុងការលើកកម្ពស់សមត្ថភាព រក្សាសន្តិភាពជូនមាតុភូមិ សណ្ដាប់ធ្នាប់សាធារណៈ និងសុវត្ថិភាពសង្គម ដែលជាបុព្វហេតុ ស្នូលបម្រើឲ្យការអភិវឌ្ឍគ្រប់វិស័យ ជាពិសេសធ្វើឲ្យគ្រប់ភូមិ-ឃុំមានសុវត្ថិភាពគ្មានបទឧក្រិដ្ឋកើតឡើង ។
សម្ដេចក្រឡាហោម បានបញ្ជាក់ ថា ក្រៅពីភារកិច្ចស្នូលប្រចាំថ្ងៃ នគរបាលជាតិកម្ពុជាត្រូវមានភារកិច្ចដ៍សំខាន់ចាំបាច់មួយ នោះគឺការធានាឲ្យបាននូវបរិយាកាសសន្តិសុខ សណ្ដាប់ធ្នាប់សម្រាប់ព្រឹត្តិការណ៍បោះឆ្នោត ជ្រើសរើសក្រុមប្រឹក្សាឃុំ សង្កាត់អាណត្តិទី៤ ដែលជាកិច្ចការ ប្រកបដោយអាទិភាព តម្រូវឲ្យមានកិច្ចសហការជាមួយកងម្លាំងប្រដាប់អាវុធគ្រប់ប្រភេទ ជាមួយ គ.ជ.ប គ្រប់ថ្នាក់ និងផ្នែកពាក់ព័ន្ធទាំងអស់ ធ្វើឲ្យដំណើរការបោះឆ្នោត ប្រព្រឹត្តទៅប្រកបដោយសេរី ត្រឹមត្រូវ និងយុត្តិធម៌ គ្មានការគម្រាមកំហែង និងអំពើហិង្សា ៕
