ព្រះរាជពិធីច្រត់ព្រះនង្គ័ល ត្រូវបានប្រារព្ធឡើងនៅថ្ងៃ ៤ រោច ខែពិសាខ
សារព័ត៌មាន Cambodia News/
ភ្នំពេញ (១១ ឧសភា ២០១៧) ៖ ព្រះរាជពិធីច្រត់ព្រះនង្គ័ល ត្រូវបានរៀបចំប្រារព្ធឡើងយ៉ាងអធិកអធម ជារៀងរាល់ឆ្នាំនៅក្រោមព្រះអធិបតីភាព នៃ ព្រះមហាក្សត្រ ប្រចាំនគរ រួមទាំងមន្ត្រី អ្នកមុខអ្នកការ និងប្រជានុរាស្ត្រគ្រប់ជាន់ថ្នាក់ នៅទីលាន វាលព្រះមេរុនៅភ្នំពេញ ឬទីលានជល់ដំរីនៅខេត្តសៀមរាប និងតាមបណ្តាខេត្តផ្សេងៗទៀត។
ព្រះរាជពិធីនេះ ជាពិធីមង្គលមួយដែលព្រះករុណា ព្រះមហាក្សត្រ ចាត់ទុក ថា ជាការចាប់ផ្តើមប្រកក់ប្រសិទ្ធឲ្យដល់ប្រជាកសិករក្នុងការធ្វើស្រែចម្ការនៅរដូវវស្សា ឲ្យទទួលបានទិន្នផលខ្ពស់ ព្រមទាំង បង្ហាញឲ្យប្រជាកសិករទូទាំងនគរឲ្យបានដឹងថា ដល់ពេលដែលត្រូវចាប់ផ្តើមការដាំដុះហើយ ។ ពិធីនេះត្រូវបានប្រារព្ធឡើងដោយមានបុរសម្នាក់ឈ្មោះថា(ស្តេចមាឃ)ដែលកាន់នឹម និងនង្គ័ល, និងស្ត្រីម្នាក់ ឈ្មោះថា (ព្រះម៉ែមេ ហួរ) ដែលសាបពូជស្រូវ ដើរតាមក្រោយនង្គ័ល។
គេមានជំនឿថា ពិធីនេះត្រូវបានគេរៀបចំតាមលំនាំសាសនាព្រហ្មញ្ញ ដោយផ្សងទឹកភ្លៀងតាមរយៈការដាក់ភោគផល ឬ អាហារ៧យ៉ាង រៀបដាក់តុប្រាក់ធំៗ តាំងទុកនៅទីមុខព្រះពន្លា គឺគ្រាប់ស្រូវ១តុ គ្រាប់សណ្ដែក១តុ គ្រាប់ពោត១តុ គ្រាប់ល្ង ១តុ ស្មៅស្រស់១តុ ទឹក១តុ ស្រា១តុដើម្បីឲ្យគោឧសភរាជស៊ីផឹកតាមចិត្តរយៈពេលពេញមួយកម្មវិធីផ្សងនេះ ។
ទាក់ទងនឹងពេលវេលា កាលពីបុរាណ ពិធីនេះត្រូវបានគេប្រារព្ធរយៈពេល ៣ថ្ងៃ។ តែក្រោយមកដោយការវិវត្តជឿនលឿន នៃសង្គម និងម្យ៉ាងដោយ ព្រះរាជា មន្ត្រីដែលជាអ្នកមុខអ្នកការ រួមទាំងប្រជារាស្ត្រមានភាពមមារញឹកផងនោះ ទើបព្រះរាជាលោក ក៏បានសម្រេចការប្រារព្ធពិធីនេះមកនៅត្រឹមរយៈពេលមួយថ្ងៃវិញ ពោលគឺចំថ្ងៃ ៤ រោច ខែពិសាខ ជារៀងរាល់ឆ្នាំ៕
