ព្រះសុវណ្ណកោដ្ឋ និងព្រះបរម សារីរិកធាតុត្រូវបានរកឃើញវិញហើយ
សារព័ត៌មាន Cambodia News/
ភ្នំពេញ(៧ កុម្ភៈ ២ឥ១៤)៖ ព្រះសុវណ្ណកោដ្ឋ និងព្រះបរមសារីរិកធាតុ បានយាងត្រឡប់មកឃុំគ្រងព្រះរាជាណាចក្រកម្ពុជាវិញ ហើយ បន្ទាប់ពីក្រុមចោរឥតសាសនាលួចយក ទៅអស់រយៈពេលជិត ២ខែពីព្រះសក្យមុនីចេតិយ លើភ្នំព្រះរាជទ្រព្យ។
ជាមួយនឹងការតាមរកឃើញមកវិញ នូវព្រះសុវណ្ណកោដ្ឋ និងព្រះបរមសារីរិកធាតុកម្លាំងសមត្ថកិច្ច ក៏បានឃាត់ខ្លួនជនល្មើសឈ្មោះ កែវ រស្មី ភេទប្រុស អាយុ ២៤ឆ្នាំ មុខរបរមិនពិតប្រាកដ និងជាជនញៀនថ្នាំ
ដែលជាអ្នកធ្វើសកម្មភាពលួច រួមនិងស្រ្តីជាអ្នកទទួលទិញ៣តំណមកហើយនោះ ឈ្មោះ សារ៉េត អាយុជាង ៣០ឆ្នាំ ដែលជនសង្ស័យស្ថិតក្នុង ភូមិកោះ ឃុំខ្វាវ ស្រុកទ្រាំង ខេត្តតាកែវ។
បើតាមប្រភពពីសមត្ថកិច្ច ខេត្តកណ្តាល បានបញ្ជាក់ថា បន្ទាប់ពីការបើកស្រាវជ្រាវរកឃើញនៅក្នុង ខេត្តតាកែវហើយនោះ កម្លាំងសមត្ថកិច្ច រួមនឹងកម្លាំងខេត្តកណ្តាល និមន្តសម្តេចព្រះពោធិវាំង អ៊ំ លឹមហេង ព្រះសង្ឃនាយករងទី ២ ទៅពិនិត្យមើល ។
ក្រោយការពិនិត្យរបស់សម្តេចសង្ឃ អ៊ំ លឹមហេង បានបញ្ជាក់ថា ព្រះសុវណ្ណកោដ្ឋ និងព្រះបរមសារីរិកធាតុ ពិតជានៅគង់វង្សដូចដើមមិនទាន់មានការបាត់បង់នោះទេ ។ សូមបញ្ជាក់ថា ការពិនិត្យមើល ព្រះសុវណ្ណកោដ្ឋ និង ព្រះបរមសារីរិកធាតុ ដោយសម្តេចសង្ឃ គឺមានការចូលរួមពី អភិបាលខេត្តកណ្តាល និង តាកែវ រួមនឹងចៅក្រមទាំងពីរខេត្ត ព្រមទាំង ស្នងការនគរបាលទាំងពីរខេត្តផងដែរ ។
សូមបញ្ជាក់ថា ព្រះសុវណ្ណកោដ្ឋព្រះបរមសារីរិកធាតុ និងវត្ថុមានតម្លៃជាច្រើនទៀត ដែលតម្កល់ទុកគោរពបូជានៅក្នុងព្រះសក្យមុនីចេតិយលើភ្នំព្រះរា ជទ្រព្យ ត្រូវបានក្រុមចោរឥតសាសនាលួចយកទៅកាលពីវេលាយប់ទៀបភ្លឺ ថ្ងៃទី១០ ខែធ្នូ ឆ្នាំ២០១៣៕
