សោភ័ណ្ឌ ឡារី រិះគន់ការ ចាក់បញ្ចាំងរឿងថៃ

សារព័ត៌មាម​ Cambodia News​/

ភ្នំ​ពេញ​ (១៧ កញ្ញា ២០១៥) ៖ ថ្មីៗនេះ លោក សោភ័ណ្ឌ ឡារី ដែលទស្សនិកជន បាន​ស្គាល់​លោក យ៉ាងច្បាស់ថា ជា តារា សម្តែង ដែលមាន សកម្មភាព ច្រើនក្នុងឆាកនយោបាយ បាន​បង្ហាញសារ ខ្លីរិះគន់ ទៅ លើ ការចាក់បញ្ចាំងរឿងថៃ ដែលកាន់តែ រីកដុះដាល ដូច​ផ្សិត​លើកញ្ចក់ទូរទស្សន៍ខ្មែរ។

តារាសម្តែងបុរសសង្ហា លោក សោភ័ណ្ឌ ឡារី បានសរសេរថា «ទោះជាតារាភាគច្រើន មិន​ហ៊ាននិយាយ តែខ្ញុំហ៊ាននិយាយ ព្រោះនេះជារឿងរបស់ជាតិមួយផ្នែកដែរ ! វប្បធម៌បរទេស ខ្ញុំដឹងថា មិនអាច ជៀសរួចទេ គ្រាន់តែឲ្យមានកម្រិត តែនេះដូចជាលើសលប់ ច្រើន​ពេក​ហើយ​,កុំឲ្យអស់ធាតុដើម យើងជាខ្មែរ … ខ្ញុំ យល់ហើយ បើគ្មានការប្រៀបធៀប , ប្រឡង​ប្រជែងទេ ក៏គ្មានការជឿនលឿនដែរ គឺដូចកង្កែប ក្នុងអណ្តូងអ៊ីចឹងថា មេឃជារបស់អញ តែម្នាក់គត់ មានតែមេឃទេ ដែលល្អជាងគេ …» ។

ក្នុងនោះលោក ក៏បានបន្ថែមសារ បែបទទូចស្នើ ទៅដល់ក្រសួងពាក់ព័ន្ធបន្ថែមទៀតថា «សូម​មេត្តាក្រសួងស្ថាប័ន ដែលពាក់ពន្ធ័ជួយមើល ហើយគិតផង អាណិត​ដល់​អ្នក​សិល្ប:​ខ្មែរ​ អ្នកដឹកនាំ អ្នកផលិតករខ្មែរ អ្នកខ្លះរកតែលុយ ទិញបាយ ឬបង់ថ្លៃផ្ទះជួល មិនបានផង ហើយសិល្បៈខ្លះទៀត ដល់ឈឺវេទនា បណ្តោយ សូមគិត និងថែរក្សា វប្បធម៌ ឲ្យបាន​គង់​វង្សផង»។

​គួរ​បញ្ញាក់ថាផង​ដែរ​ថា បច្ចុប្បន្ននេះ ស្ថានីយទូរទស្សន៍ ក្នុងស្រុកជាច្រើន បាន​នាំ​គ្នាចា​ក់​ផ្សាយ​រឿងថៃ ជាបន្តបន្ទាប់ ដោយនៅក្នុងនោះ មានស្ថានីយទូរទស្សន៍ My TV, CTN, ETV ប៉ុស្តិ៍លេខ3, ប៉ុស្តិ៍លេខ៥, ស្ថានីយទូរទស្សន៍បាយ័ន និងទូរទស្សន៍អាស៊ីអាគ្នេយ៍ ជា​ពិសេស​​ ស្ថានីយទូរទស្សន៍ PNN ដែលទើបតែផ្សាយជាផ្លូវការ កាលពីពេល ថ្មីៗនេះ ក៏​បាន​ទិញ​សិទ្ធិ​ចាក់​បញ្ចាំងរឿងភាគថៃ ផងដែរ ៕