វិទ្យាល័យ៦ ក្នុងខេត្តព្រះសីហនុត្រូវបានដាក់ប្រព័ន្ធស្កេនពិនិត្យវត្តមានសិស្ស
សារព័ត៌មាន Cambodia News/
ព្រះសីហនុ (០១ មីនា ២០១៧) ៖ តាម លោក តេង វណ្ណឌី នាយកវិទ្យាល័យ ហ៊ុន សែន មិត្តភាព ស្ថិតនៅក្នុងភូមិ៥ សង្កាត់៤ ក្រុងព្រះសីហនុ ខេត្តព្រះសីហនុ បានឲ្យដឹងថា ម៉ាស៊ីនស្កេនត្រួតពិនិត្យវត្តមានសិស្ស បានដាក់ឲ្យដំណើរការនៅវិទ្យាល័យហ៊ុន សែន មិត្តភាព រយៈពេល៣ថ្ងៃហើយ ដែលនេះគឺជាការសាកល្បងរបស់កម្មវិធីក្រសួង អប់រំយុវជន និងកីឡា។
លោក នាយកសាលាដដែល បានបន្ថែមទៀតថា កម្មវិធីត្រួតពិនិត្យវត្តមានតាមប្រព័ន្ធកុំព្យូទ័រខាងលើនោះ ត្រូវបានសាកល្បងនៅតាមវិទ្យាល័យចំនួន៦ នៅខេត្តព្រះសីហនុ។ គិតមកត្រឹមពេលនេះ ការស្កេនសាកល្បង ធ្វើឡើងចំពោះតែសិស្សានុសិស្សថ្នាក់ទី១០តែប៉ុណ្ណោះ។
ការស្កេននោះ គឺមានជម្រើសពីរ ទីមួយអាចស្កេនមេដៃក៏បាន និងប្រើកាតស្កេនក៏បាន ហើយមានអ្នកប្រចាំការផ្នែកប្រព័ន្ធព័ត៌មានវិទ្យាម្នាក់នៅចាំពិនិត្យមើល មិនឲ្យមានការបន្លំផ្ញើកាតឲ្យស្កេនជំនួសនោះទេ។ នេះបើតាមការបញ្ជាក់របស់ លោក នាយកវិទ្យាល័យ៕
