ទូរទស្សន៍រដ្ឋចិនឈប់ចាក់បញ្ចាំងភាពយន្តអាម៉េរិកបន្ទាប់ពីមានជម្លោះពាណិជ្ជកម្ម
សារព័ត៌មាន Cambodia News/
ចិន (២១ ឧសភា ២០១៩) ៖ មានសេចក្តីរាយការណ៍មកថា ស្ថានីយទូរទស្សន៍រដ្ឋចិនដ៏ធំមួយបានដកភាពយន្តហូលីវូតអាម៉េរិកនិងខ្សែភាពយន្តចិនដែលឈុតឆាកខ្លះថតនៅអាម៉េរិកចេញពីតារាងចាក់បញ្ចាំងរបស់ខ្លួន និងជំនួសមកវិញនូវខ្សែភាពយន្តសង្គ្រាមបុរាណរបស់ចិនដែលបង្ហាញទាហានចិនវាយកម្ចាត់អាម៉េរិក។
អារម្មណ៍ប្រឆាំងអាម៉េរិកកើតមានឡើងបន្ទាប់ពីប្រធានាធិបតីអាម៉េរិកកាលពីសប្តាហ៍មុនបានសម្រេចចិត្តដំឡើងពន្ធពី១០ទៅ២៥ភាគរយលើទំនិញចិនតម្លៃ២០០ពាន់លានដុល្លារ និងចេញបម្រាមផ្លូវការមិនឲ្យប្រើឧបករណ៍ឬបច្ចេកវិទ្យារបស់ក្រុមហ៊ុនយក្សចិនHuawei៕
ស្ថានីយទូរទស្សន៍China Movie Channel ដែលគេស្គាល់ថាCCTV-6 បានចាប់ផ្តើមបំពេញម៉ោងធ្លាប់តែចាក់បញ្ចាំងខ្សែភាពយន្តអាម៉េរិកជាមួយនឹងភាពយន្តសង្គ្រាមចិនប្រឆាំងអាម៉េរិកដូចជារឿង «វីរៈបុត្រាបុត្រី(១៩៦៤) » «សមរភូមិលើភ្នំសាងហ្កានលីង(១៩៥៤)» និងរឿង«ការវាយប្រហារដ៏ភ្ញាក់ផ្អើល(១៩៦០)» ៕
