ប៉ូលីសកំពុងតាមប្រម៉ាញ់ចៅសង្កាត់ដែលវាយសន្តិសុខ
សារព័ត៌មានយុវវ័យថ្មី/
ភ្នំពេញ (២៦ តុលា ២០១៦) ៖ ឯកឧត្ដមនាយឧត្ដមសេនីយ៍ ជួន សុវណ្ណ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានចេញបញ្ជាអោយតាមចាប់ចៅសង្កាត់ព្រែកប្រា ឈ្មោះហួរ ហួត តាំងពីក្រោយថ្ងៃកើតហេតុភ្លាមៗមកម្ល៉េះ ប៉ុន្តែចៅសង្កាត់រូបនេះបានរត់គេចខ្លួនក្រោយពីជនរងគ្រោះមានអាការៈរបួសធ្ងន់ធ្ងរ ។ នេះបើយោងតាមប្រភពច្បាស់ការពីស្នងការដ្ឋាននគរបាលរាជធានីភ្នំពេញ ។
បើតាមការចុះផ្សាយរបស់សារព័ត៌មានក្នុងស្រុកមួយចំនួន ចៅសង្កាត់ព្រែកប្រាឈ្មោះ ហួរ ហួត បានវាយសន្តិសុខមួយដៃចំក្បាលទប់ទៅ នឹងជញ្ជាំងថ្មកាលពីល្ងាចថ្ងៃទី២៤ ខែតុលា ឆ្នាំ២០១៦ បណ្ដាលអោយសន្តិសុខរូបនេះ ចូលសង្គ្រោះបន្ទាន់នៅមន្ទីរពេទ្យបង្អែកច្បារអំពៅ រួចក៏បញ្ជូនទៅសង្គ្រោះបន្តនៅមន្ទីរពេទ្យមិត្តភាពខ្មែរ សូវៀត។ បច្ចុប្បន្នសន្តិសុខរូបនេះពុំទាន់មានស្មារតីប្រសើរឡើងវិញនៅឡើយទេ ដែលគ្រូពេទ្យនិយាយថា អាចប៉ះពាល់ដល់សរសៃប្រសាទខួរក្បាល ។
លោក ហួរ ហួត វាយវាយលើជនរងគ្រោះមួយដៃផ្ទប់ជញ្ជាំង នេះជាបទល្មើសព្រហ្មទណ្ឌជាក់ស្តែង ស្របតាមមាត្រា៨៦ នៃក្រមនីតិវិធីព្រហ្មទណ្ឌ ដែលមន្ត្រីនគរបាលយុត្តិធម៌ ឬសាធារណជន មានសិទ្ធិឃាត់ខ្លួនជនសង្ស័យ ឬ ព្រះរាជអាជ្ញាមានសិទ្ធិបញ្ជាឲ្យឃាត់ខ្លួន ប៉ុន្តែជាក់ស្តែងលោក ហួរ ហួត កំពុងមានសេរីភាព ៕
