ថៃ ខាតបង់១ពាន់លានបាតក្នុង១ថ្ងៃ ធ្វើឲ្យពលរដ្ឋរាប់លាននាក់រងផលប៉ះពាល់
ថៃ(១៤ មករា ២០១៤) ៖ កាលពីថ្ងៃ ទី១៣ខែមករា ក្រុមបាតុករប្រឆាំងរាប់ពាន់នាក់ បានគ្រប់គ្រងទីក្រុងបាងកកធ្វើឲ្យសកម្មភាពនានាត្រូវកកស្ទះ ។ ក្រុមបាតុករកំពុងបង្ខំឲ្យលោកស្រីយីងឡាក់ចុះចេញបើកផ្លូវឲ្យ រដ្ឋាភិបាល ជ្រើសរើសដោយក្រុមប្រឆាំងឡើងកាន់កាប់ដឹកនាំវិញម្តង ដើម្បីធ្វើការកែទម្រង់ ប្រព័ន្ធបោះឆ្នោត លុបចោលត្រកូលស៊ីណាវាត្រាក្នុងឆាកនយោបាយថៃ។
ប្រភពព័ត៌មានពីរដ្ឋាភិបាលថៃបាន ឲ្យដឹងថា ការធ្វើបាតុកម្មបិទក្រុងបាងកកធ្វើឲ្យសេដ្ឋកិច្ចថៃខាតបង់ ទឹកប្រាក់១ពានលានបាតក្នុង១ថ្ងៃ ។ ប៉ូលិសថៃបានឲ្យដឹងថា នៅពេលនេះមន្ទីរពេទ្យចំនួន១២ សណ្ឋាគារចំនួន២៨ សាលារៀន២៤កន្លៃង និងស្ថានីយពន្លត់អគ្គិភ័យ៥កន្លែងត្រូវបិទទ្វារដោយបាតុកម្ម ចំណែករថយន្តក្រុង រថភ្លើង និងផ្លូវលើអាកាសនៅដំណើរការធម្មតា។
រដ្ឋាភិបាលក៏ដូចជាកម្លាំងយោធាមិន ទាន់មានប្រតិកម្មអ្វីនោះឡើយ ទុកឲ្យបាតុករធ្វើអ្វីតាមអំពើចិត្ត ប៉ុន្តែបើមានរឿងអាក្រក់កើតឡើង កម្លាំងទាហាននិងប៉ូលិស ២ម៉ឺននាក់ចូលរួមការពារ ដាក់ប្រទេសក្នុងគ្រាមានអាសន្នបង្ខំឲ្យបំបែកហ្វូងបាតុករជាមិនខាន ។
ពលរដ្ឋថៃជិត៣លាននាក់រងផល ប៉ះពាលដោយផ្ទាល់ពីការបិទក្រុងបាងកក ពិសេសគឺក្រុមកម្មករជាង១លាន២សែននាក់ និងនិស្សិតជាង៤៤០ពាន់នាក់រងការប៉ះពាលយ៉ាងខ្លាំង ។ មធ្យោបាយធ្វើដំណើរជិត៥លានជើងជួបផលលំបាកនៅថ្ងៃដំបូងដែល បិទទ្វារក្រុង។
ក្រុមហ៊ុនគ្រប់គ្រងអាកាសយានថៃ Airports of Thailand plc បានចែកចាយស្លាកសម្គាល់៦ពាន់សន្លឹក សម្រាប់បិទនៅលើរថយន្តដឹកជញ្ចូនអ្នកដំណើរ រថយន្តតាក់ស៊ីរបស់អាកាសយានដ្ឋាន ដើម្បីឲ្យក្រុមបាតុករសម្គាល់និងបើកផ្លូវឲ្យធ្វើចរាចរណ៍។ ក៏ប៉ុន្តែប្រសិនបើការបិទក្រុងគ្មានប្រសិទ្ធភាព គោលដៅចុងក្រោយគឺអាកាសយានដ្ឋានដូចកាលពីឆ្នាំង២០០៦៕