សវនាការកាត់ទោសអ្នកចិញ្ចឹមត្រីដ៏ល្បីឈ្មោះម្នាក់ដែលត្រូវគេបណ្តេញចេញពីដីធ្លី
នៅថ្ងៃអង្គារនេះ តុលាការវៀតណាមបានបើកសវនាការកាត់ទោសអ្នកចិញ្ចឹម ត្រីដ៏ល្បី ម្នាក់ ឈ្មោះ Doan Van Vuon ដែលត្រូវបានកងកម្លាំងវៀតណាមបណ្តេញចេញពីដីធ្លី កាលពីខែមករា ឆ្នាំ ២០១២។ លោក Vuon ជាប់ចោទពីបទប៉ុនប៉ងធ្វើឃាត ដោយសារលោកបានប្រើគ្រឿងផ្ទុះតបតទៅនឹងកងកម្លាំងដែលចុះ មកបណ្តេញរូបលោកអោយចាកចេញពីដីធ្លីរបស់លោក។ នៅខាងក្រៅតុលាការ គេឃើញសកម្មជនគាំទ្រលោក Vuon ជាង១០នាក់ ធ្វើការបង្កហេតុជាមួយប៉ូលិសដែលយាមកាមនៅទីនោះ។
នៅថ្ងៃអង្គារនេះ ជាថ្ងៃកាត់ទោសរូបលោក Doan Van Vuon ជាអ្នកចិញ្ចឹមត្រីដ៏ល្បីឈ្មោះម្នាក់ដែលត្រូវបានគេបណ្តេញចេញ ពីដីធ្លី។ លោក Vuon ជាប់ចោទពីបទប៉ុនប៉ងធ្វើឃាត ព្រោះលោកបានប្រើគ្រឿងផ្ទុះតបតទៅនឹងកងកម្លាំងដែលចុះ មកបណ្តេញរូបលោកអោយចាកចេញពីដី ធ្លី។ បុរសបីរូបទៀត ក៏បានជាប់ទោសពីបទប៉ុនប៉ងធ្វើឃាតដូចរូបលោកដែរ។ រីឯប្រពន្ធរបស់លោក បានជាប់ទោសពីបទតបតទៅនឹងកងកម្លាំងវិញ។
អ្វីដែលគួរអោយកត់សម្គាល់គឺថា វត្តមានដ៏លើសលប់របស់ប៉ូលិសដែលដាក់ការពារ នៅថ្ងៃកាត់ក្តីនេះ។ ប៉ូលិសរាប់រយនាក់បានបិទផ្លូវនានា ដែលអាចអោយគេធ្វើដំណើរទៅកាន់តុលាការ Haïphong ស្ថិតនៅភាគឥសាន ដើម្បីហាមឃាត់មិនអោយអ្នកគាំទ្រលោក Vuon ទៅកាន់តុលាការបាន។ អ្នកគាំទ្រនានា បានជាប់ស្ទះនៅបរិវេណក្រៅក្រុង។
ការបណ្តេញលោក Vuon ចេញពីដីធ្លីរបស់លោក រួមនឹងទង្វើហ៊ានតបតទៅនឹងកងកម្លាំងរបស់លោក Vuon បានធ្វើអោយអ្នកចិញ្ចឹមត្រីរូបនេះក្លាយជាវីរបុរសដ៏មាន ប្រជាប្រិយភាពនៅវៀតណាម។ ការតបតទៅនឹងការបណ្តេញចេញពីដីធ្លីបែបយ៉ាងដូចលោក គឺជាករណីដ៏កំរមានណាស់ នៅក្នុងប្រទេស កុំម្មុយនិស្តដូចជាវៀតណាមនេះ។ អាស្រ័យហេតុនេះ រឿងក្តីនេះបានបង្កអោយមានការឃោសនាគាំទ្ររូបលោកនិងជនជាប់ចោទ ឯទៀត នៅទូទាំងប្រទេស។
គេសង្កេតឃើញថា សូម្បីតែនាយករដ្ឋមន្ត្រីវៀតណាម លោក Nguyen Tan Dung ក៏បានវាយតំលៃដែរថា ការបណ្តេញលោក Vuon អោយចេញពីដីធ្លី គឺធ្វើផ្ទុយទៅនឹងច្បាប់។ នាយករដ្ឋមន្ត្រីវៀតណាមបានសន្យាដាក់ទោសអ្នកទទួលខុសត្រូវនានា ដែលជាប់ក្នុងបទពុករលួយក្នុងរឿងបណ្តេញមនុស្សអោយចេញពីដីធ្លី នេះ។
នៅថ្ងៃចន្ទសប្តាហ៍ក្រោយ អ្នកទទួលខុសត្រូវ៥រូប នឹងត្រូវតុលាការកាត់ ទោស ពីបទបំផ្លាញផ្ទះសម្បែងរបស់លោក Vuon។
លោក Pham Hong Son ដែលជាសកម្មជនម្នាក់ធ្លាប់ជាប់ពន្ធនាគាររាប់ឆ្នាំ ពីបទបានធ្វើសកម្មភាពគាំទ្រប្រជាធិបតេយ្យ បានសំដែងការព្រួយបារម្ភខ្លាចលោក Vuon ទទួលទោសធ្ងន់ធ្ងរ ព្រោះថាប្រសិនបើតុលាការដាក់ទោសស្រាលពេក នឹងអាចធ្វើអោយអ្នកដែលត្រូវគេបណ្តេញចេញពីដីធ្លីផ្សេងៗទៀត បញ្ចេញប្រតិកម្មខ្លាំងជាងនេះ។
គួររំលឹកថា ក្នុងប៉ុន្មានឆ្នាំចុងក្រោយនេះរឿងជម្លោះដីធ្លីនៅវៀតណាម មានការកើនឡើងទ្វេដង ហើយជម្លោះ៧០ភាគរយបានប្រែក្លាយអោយមានជាពាក្យបណ្តឹងដាក់ទៅ អាជ្ញាធរអោយដោះស្រាយ។
យោងតាមរដ្ឋាភិបាលវៀតណាម ប្រជាជនដែលត្រូវគេអោយចាកចេញពីទី លំនៅដីធ្លីរបស់ខ្លួន បានទទួលនូវសំណងពីរដ្ឋាភិបាល។ ប៉ុន្តែជាញឹកញាប់ ពួកគេពុំបានទទួលប្រាក់សំណងទាំងនោះឡើយ ដោយសារតែមានបញ្ហាពុករលួយក្នុងផ្នែករដ្ឋបាលគ្រប់គ្រងប្រាក់ សំណងនោះ៕ដោយ ព្រំ សឿន សូលីណា (RFI)
