សម្តេចតេជោ ហ៊ុន សែន នឹងចាកចេញទៅកាន់ប្រទេសរុស្ស៊ីយប់នេះ
សារព័ត៌មាន Cambodia News/
ភ្នំពេញ (១៦ ឧសភា ២០១៦) ៖ នៅវេលាម៉ោង៩ និង៣០នាទីយប់ថ្ងៃទី១៦ឧសភានេះ សម្តេចអគ្គមហាសេនាបតីតេជោ ហ៊ុន សែន នឹងដឹកនាំគណៈប្រតិភូជាន់ខ្ពស់រាជរដ្ឋាភិបាលអញ្ជើញទៅបំពេញទស្សនកិច្ច ការងារ និងចូលរួមកិច្ចប្រជុំកំពូលរំលឹកខួបអាស៊ាន-រុស្ស៊ី នៅទីក្រុងម៉ូស្គូ និងសូឈី សហព័ន្ឋរុស្ស៊ី ។
តាម សេចក្តីជូនព័ត៌មានរបស់ក្រសួងការបរទេស និងសហប្រតិបត្តិការអន្តរជាតិបានឲ្យដឹងថា អំឡុងពេលដំណើរទស្សនកិច្ចការងារ និងចូលរូមកិច្ចប្រជុំកំពូលខាងលើ ដែលធ្វើឡើងតាមការអញ្ជើញរបស់លោក ឌីមីទ្រី មេដវេដេវ នាយករដ្ឋមន្ត្រីរុស្ស៊ី ពីថ្ងៃទី១៧ដល់ថ្ងៃទី២១ ឧសភា ២០១៦ សម្តេចតេជោនាយករដ្ឋមន្ត្រី នឹងជួបពិភាក្សាការងារជាមួយលោកប្រធានាធិបតីរុស្ស៊ី វ្ល៉ាឌីមៀរ ពូទីន និងជួបចរចាទ្វេភាគីជាមួយលោកនាយករដ្ឋមន្ត្រីសហព័ន្ឋរុស្ស៊ី ឌីមីទ្រី មេដវេដេវ ។
សេចក្តីជូនព័ត៌មានដដែលក៏បានបញ្ជាក់ ទៀតថា ក្រោយបញ្ចប់កិច្ចប្រជុំកំពូលរំលឹកខួបអាស៊ាន-រុស្ស៊ី សម្តេចតេជោ ហ៊ុន សែន ក៏នឹងជួបទ្វេភាគីជាមួយលោក ង្វៀន សួនហ្វ៊ុក នាយករដ្ឋមន្ត្រីវៀតណាមទើបឡើងកាន់តំណែងផងដែរ ៕
