ដោយសារតែភ្លើងប្រច័ណ្ឌ គ្រាន់តែឃើញមុខប្រពន្ធកាប់គ្មានប្រណីដៃ
សារព័ត៌មាន Cambodia News/
ភ្នំពេញ (១៩ មេសា ២០១៦) ៖ បុរសម្នាក់បានទៅធ្វើជាពលករនៅប្រទសថៃរយៈពេល២ខែកន្លងមកហើយ ដោយទុកឱ្យប្រពន្ធ ស្នាក់នៅផ្ទះជួលមួយកន្លែង ធ្វើជាកម្មការិនីរោងចក្រកាត់ដេរ ហើយនៅមួយរយៈពេលចុងក្រោយនេះ មានអ្នកស្គាល់លួចខ្សិបប្រាប់ថា ប្រពន្ធផិតក្បត់មានសហាយធ្វើឱ្យបុរសនោះខឹងយ៉ាងខ្លាំង ក៏បានធ្វើដំណើរចាកចេញពីប្រទេសថៃ ត្រឡប់មកវិញ ដោយមានបំណងតែមួយគត់ គឺសម្លាប់ប្រពន្ធចោលតែម្ដង ។
លុះ ពេលត្រឡប់មកដល់ បានប្រទះឃើញខោលីអូ និងកាបូបស្ពាយរបស់បុរសស្ថិតក្នុងបន្ទប់ជួលដែលនាងជាប្រពន្ធ ស្នាក់នៅ ជាហេតុធ្វើឱ្យមានកំហឹងកាន់តែខ្លាំងឡើងថែមទៀត ក៏បានយកទួណឺវីសចាក់ទៅលើប្រពន្ធ បណ្ដាលឱ្យដួល រួចបានទាញកាំបិតបុ័ងតោកាប់ឥតប្រណីដៃ បណ្ដាលឱ្យនាងរបួសធ្ងន់ធ្ងរ ដេកដួលនៅក្នុងថ្លុកឈាម ។
ហេតុការណ៍នោះបានកើតឡើងកាលពីវេលា ម៉ោង១និង៣០នាទីរសៀល ថ្ងៃទី១៧ មេសា នៅចំណុចផ្ទះជួលមួយកន្លែង ក្នុងបូរីសន្តិភាព១ ភូមិចោមចៅ សង្កាត់ចោមចៅ ខណ្ឌពោធិ៍សែនជយ័ រាជធានីភ្នំពេញ ។
ស្ត្រីជាប្រពន្ធដែលជាជនរងគ្រោះ ឈ្មោះ អាន ស្រីរ៉ង អាយុ២៤ឆ្នាំ ជាកម្មការិនីរោងចក្រកាត់ដេរ ស្នាក់នៅផ្ទះជួលចភូមិកើតហេតុខាងលើ ។ នាងបានរងរបួសដាច់ម្រាមដៃឆ្វេងអស់៣ និងពោះ២កន្លែងដេកដួលក្នុងថ្លុកឈាម ។ ចំណែកជនកំណាចជាប្ដី និងជាជនដៃដល់នោះ ឈ្មោះ ផេង សុផាណេត អាយុ៣១ឆ្នាំ ជាពលករធ្វើការនៅប្រទេសថៃ ក្រោយកើតហេតុបុរសដៃដល់ជាប្តីត្រូវបានប៉ូលិសចាប់ខ្លួនបានភ្លាមៗ ផងដែរ ៕
