បច្ចុប្បន្ន អត្រាមរណៈរបស់ទារកសម្រាលមិនគ្រប់ខែនៅតែខ្ពស់នៅឡើយ បើធៀបប្រទេសក្នុងតំបន់
សារព័ត៌មាន Cambodia News/
លោកសាស្ត្រាចារ្យ ធា គ្រុយ រដ្ឋលេខាធិការក្រសួងសុខាភិបាល មានប្រសាសន៍ថា ចំនួនទារកសម្រាលមិនគ្រប់ខែមានចំនួនច្រើន ហើយអត្រាមរណៈរបស់ទារកសម្រាលមិនគ្រប់ខែនៅតែខ្ពស់នៅឡើយ បើប្រៀបធៀបទៅនឹងប្រទេសក្នុងតំបន់។
លោកសាស្ត្រាចារ្យ ធា គ្រុយ បានមានប្រសាសន៍បែបនេះក្នុងសន្និសីទលើកទី១ ស្តីពីបច្ចុប្បន្នភាពរោគកុមារវិទ្យានៅកម្ពុជា នាសណ្ឋាគារសូហ្វីតែល រៀបចំឡើងដោយសមាគមគ្រូពេទ្យកុមារកម្ពុជា ដែលមានការចូលរួមពីសមាជិកសមាគមគ្រូពេទ្យកុមារកម្ពុជា ចំនួនជាង៣០០នាក់។
លោកសាស្ត្រាចារ្យបានបន្តថា ជំងឺរាករបស់កុមារ នៅតែជាចំណុចចំបងនៃសុខភាពសាធារណៈ និងជាកត្តាបណ្តាលអោយមានការប៉ះពាល់ដល់ការលូតលាស់របស់កុមារ ជាពិសេសកង្វះអាហារូបត្ថម្ភ បើសិនជាកុមារទទួលរងនូវជំងឺរាករុសនេះញឹកញាប់ ឬរ៉ាំរ៉ៃ។
លោកបានសង្កត់ធ្ងន់ថា ការគ្រប់គ្រង ព្យាបាល ថែទាំទារកមិនគ្រប់ខែ ជំងឺរាក និងជំងឺអាឡែកហ្ស៊ី សុទ្ធតែជាអាទិភាព ដែលត្រូវយកចិត្តទុកដាក់របស់ក្រសួងសុខាភិបាល ក៏ដូចជាឆ្លើយតបនឹងនយោបាយរបស់រាជរដ្ឋាភិបាលក្នុងការកាត់បន្ថយ នូវអត្រាមរណៈរបស់កុមារ។
គោលបំណងរបស់សន្និសីទនេះ គឺដើម្បីផ្តល់នូវវេទិកាដល់អ្នកឯកទេសផ្នែករោគកុមារទាំងក្នុងប្រទេស និងក្នុងតំបន់បានចែករំលែក និងផ្លាស់ប្តូរនូវបទពិសោធន៍អំពីបច្ចុប្បន្នភាពរោគកុមារវិទ្យា ដែលទាក់ទងនឹងការអនុវត្តន៍ការថែទាំ, ព្យាបាលទារកទើបនឹងកើត, ជំងឺអាឡែកហ្ស៊ី និងជំងឺនៃប្រដាប់រំលាយអាហារ៕
