អង្គការសង្គមស៊ីវិលស្វែងរកការគាំទ្រឲ្យបញ្ឈប់ទណ្ឌកម្មដល់អ្នកប្រើប្រាស់គ្រឿងញៀន
ដោយ ហេង នាង
សារព័ត៌មាន Cambodia News/
ភ្នំពេញ (២៤ មិថុនា ២០១៥)៖ នៅថ្ងៃពុធនេះ អង្គការខាណាសហការជាមួយពាក់ព័ន្ធបានបើកយុទ្ធនាការមួយក្រោមប្រធានបទ “គាំទ្រ! បញ្ឈប់ទណ្ឌកម្ម” ដើម្បីស្វែងរកការគាំទ្រធ្វើឲ្យកាន់តែប្រសើរ និងបន្ធូរបន្ថយគោលនយោបាយដែលបង្អាក់ដល់ការអនុវត្តកម្មវិធីកាត់បន្ថយគ្រោះថ្នាក់ដល់អ្នកប្រើប្រាស់គ្រឿងញៀន ហើយពួកគេអាចទទួលបានសេវាសុខភាពដោយស្ម័គ្រចិត្តជាជាងការដាក់ទោសដល់អ្នកប្រើប្រាស់គ្រឿងញៀន។
បើតាមសេចក្តីប្រកាសព័ត៌មានរបស់អង្គការខាណាដែលសារព័ត៌មានយុវវ័យថ្មីទទួលបានសរសេរថា នៅប្រទេសកម្ពុជាមានចំនួនអ្នកប្រើប្រាស់គ្រឿងញៀនប្រមាណ១៣.០០០នាក់ និងអ្នកចាក់គ្រឿងញៀនប្រមាណ១.៣០០នាក់ ហើយ៨៤% (១.០៨៦ នាក់) នៃអ្នកចាក់គ្រឿងញៀនកំពុងរស់នៅក្នុងរាជធានីភ្នំពេញ ខណៈដែលអត្រាប្រេវ៉ាឡង់មេរោគអេដស៍ក្នុងចំណោមអ្នកចាក់គ្រឿងញៀនមានកំរិតខ្ពស់ដល់ទៅ២៤.៨%។
នៅក្នុងរបាយការណ៍សិក្សាមួយដែលធ្វើដោយអង្គការខាណានៅដើមឆ្នាំ២០១៥បង្ហាញថា ការកាត់បន្ថយគ្រោះថ្នាក់ដល់អ្នកប្រើសប្រាស់គ្រឿងញៀននៅកម្ពុជានៅមិនទាន់បានជ្រួតជ្រាប និងមិនទាន់ទទួលបានជោគជ័យនៅឡើយ ហើយភាគច្រើនកើតឡើងដោយសារភាពមិនស៊ីសង្វាក់គ្នារវាងច្បាប់ស្តីពីនៃការត្រួតពិនិត្យគឿងញៀន(ឆ្នាំ ២០១២) គោលនយោបាយភូមិ/ឃុំមានសុវត្ថិភាព (ឆ្នាំ ២០១០ និងការអនុវត្តច្បាប់ចំពោះការផលិតគឿងញៀន ការជួញដូរគឿងញៀន ការកាន់កាប់គឿងញៀន និងការប្រើបាស់គ្រឿងញៀន)។
ការសិក្សាបានរកឃើញថា ដោយសារគម្លាតរវាងគោលនយោបាយ និងការអនុវត្តរួមជាមួយនឹងបរិយាកាសវប្បធម៌ “យើងពិបាកក្នុងការផ្តល់សេវាកាត់បន្ថយគ្រោះថ្នាក់ និងសេវាព្យាបាលហើយដោយសារការរឹតបន្តឹង គោលនយោបាយភូមិ/ឃុំមានសុវត្ថិភាព អ្នកប្រើប្រាស់គ្រឿងញៀនមិនហ៊ានទៅទទួលសេវាសុខភាព។ មន្រ្តីអនុវត្តច្បាប់បានធ្វើឲ្យមានការរើសអើង និងហឹង្សាលើរាងកាយចំពោះអ្នកប្រើប្រាស់គ្រឿងញៀន។ របៀបធ្វើការដោយប្រើទណ្ឌកម្មបែបនេះធ្វើឲ្យអ្នកប្រើប្រាស់គ្រឿងញៀនលាក់ខ្លួន និងធ្វើឲ្យពួកគេពិបាកនឹងទទួលសេវាព្យាបាល និងសេវាសង្គមដែលស្របតាមផ្លូវច្បាប់”។
ដោយហេតុនេះ អង្គការសង្គមស៊ីវិលបានធ្វើការអំពាវនាវនិងរំពឹងទុកថា នឹងទទួលបាន “ការគាំទ្រដ៏ខ្លាំងក្លាជាងមុនលើជីវិតអ្នកប្រើប្រាស់គ្រឿងញៀន និងសហគមន៍ប្រកបដោយសុខដុមជាងមុនដោយគ្មានគ្រឿងញៀន និងរួមគ្នាកាត់បន្ថយគ្រោះថ្នាក់នានាតាមរយៈការផ្តល់កម្មវិធីកាត់បន្ថយគ្រោះថ្នាក់ និងការព្យាបាលអ្នកញៀនគ្រឿងញៀនដោយផ្អែកលើសហគមន៍ប្រកបដោយគុណភាព និងការគោរពសិទ្ធិរបស់អ្នកប្រើប្រាស់គ្រឿងញៀន”។
គួរបញ្ជាក់ថា យុទ្ធនាការនេះមានអ្នកចូលរួមជាង២០០នាក់ ដែលក្នុងនោះមានមន្រ្តីមកពីនាយកដ្ឋានសុខភាពផ្លូវចិត្ត និងការបំពានគ្រឿងញៀននៃក្រសួងសុខាភិបាល អាជ្ញាធរជាតិប្រយុទ្ធប្រឆាំងគ្រឿងញៀន ក្រសួងមហាផ្ទៃ អង្គការសុខភាពពិភពលោក ទីភ្នាក់ងារ UNAIDS អាជ្ញាធរដែនដី មន្រ្តីអនុវត្តច្បាប់ អ្នកផ្តល់សេវាសុខភាព អ្នកសារព័តមាន និងសមាជិកសហគមន៍។ យុទ្ធនាការនេះធ្វើឡើងក៏ក្នុងបំណងចូលរួមអបអរទិវាអន្តរជាតិប្រយុទ្ធប្រឆាំងគ្រឿងញៀនដែលនឹងប្រព្រឹត្តទៅនៅថ្ងៃទី២៦ ខែ មិថុនា៕
