ក្រសួងបរិស្ថាន ប្តូរឈ្មោះទៅជា ក្រសួងធនធានធម្មជាតិ និងបរិស្ថាន
សារព័ត៌មាន Cambodia News/
ភ្នំពេញ (២៥ កុម្ភៈ ២០១៦) ៖ ក្រសួងបរិស្ថាននឹងត្រូវប្តូរឈ្មោះទៅជា ក្រសួងធនធានធម្មជាតិ និងបរិស្ថានវិញ ដើម្បីឲ្យសមស្របនឹងទំហំការងារ ក្រោយពីរដ្ឋមន្រ្តីវ័យក្មេង នៃក្រសួងមួយនេះ បានស្នើសុំផ្ទេរ ការ គ្រប់គ្រងដីសម្បទានសេដ្ឋកិច្ច ទៅក្រសួងកសិកម្ម ហើយផ្ទេរការងារគ្រប់គ្រងតំបន់អភិរក្ស និងការពារនានា មកក្រសួងបរិស្ថានវិញ។
ក្នុងពិធី បើកសម្ភោធ «អគារមរតកតេជោ» នៅព្រឹកថ្ងៃទី២៥កុម្ភៈ សម្តេចហ៊ុន សែន បានបញ្ជាក់អោយក្រសួងបរិស្ថានត្រូវផ្ទេរ តំបន់វិនិយោគដីសម្បទានសេដ្ឋកិច្ចទៅអោយក្រសួងកសិកម្មគ្រប់គ្រងវិញ រីឯតំបន់អភិរក្សដែលធ្លាប់តែក្រសួងកសិកម្មរុក្ខាប្រមាញ់ និងនេសាទគ្រប់គ្រងនោះ ត្រូវផ្ទរទៅអោយក្រសួងបរិស្ថានគ្រប់គ្រង សម្តេចតេជោនាយករដ្ឋមន្រ្តីក៏បានជំរុញអោយ ក្រសួងទាំងពីរត្រូវពិនិត្យមើលថាមុខងារណាខ្លះដែលត្រូវផ្ទេរ ដើម្បីមានភាពទទួលខុសត្រូវនិងមានប្រសិទ្ធភាព។
នៅក្នុងកម្មវិធីនេះសម្តេច បានមានប្រសាសន៏ កោតសរសើរនិងវាយតម្លៃខ្ពស់ចំពោះមន្រ្តីនៃក្រសួងបរិស្ថានដែលបាន ខិតខំប្រឹងប្រែងបំពេញការងារបានល្អ។ សម្តេចតេជោនាយករដ្ឋមន្រ្តីបានមានប្រសាសន៏បន្តថា ការងារបរិស្ថានជាកាងារសកល និងចំបាច់អោយមានការចូលរួម និងដោះស្រាយពីរាជរដ្ឋាភិបាល ដើម្បីធានាបាននូវបរិស្ថានល្អ។
អគារមរតកតេជោ ដែលបើកសម្ភោធនៅព្រឹកនេះ ត្រូវបានសាងសង់លើផ្ទៃដីទំហំ ៦,៨០០ម៉ែត្រក្រឡា មានទីតាំងចន្លោះស្ពាននាគ និងស្ពានតន្ត្រីកោះពេជ្រ។ អគារនេះ មានទទឹង ២៦ម៉ែត្រ និងបណ្តោយ ១១០ម៉ែត្រ មានកម្ពស់ ៣៩ម៉ែត្រ ស្មើនិង ៦ជាន់ បានចំណាយថវិកាសាងសង់ជិត ៨លានដុល្លារ៕
