រោងការ ក្លាយទៅជារោងបុណ្យសព ក្រោយកូនកម្លោះត្រូវរថយន្តបុកស្លាប់
សារព័ត៌មាន Cambodia News/
ភ្នំពេញ (២០ មករា ២០១៦) ៖ កូនកម្លោះ និងកូនក្រមុំ វ័យ២៤ឆ្នាំដូចគ្នា បានប្រែក្លាយរោងអាពាហ៍ពិពាហ៍ ត្រឡប់ទៅជារោងបុណ្យសពកូនកម្លោះទៅវិញភ្លាមៗ បន្ទាប់ពីកូនកម្លោះបានស្លាប់ដោយសារគ្រោះថ្នាក់ចរាចរណ៍ក្នុងថ្ងៃចូលរោងការ។
ករណី កូនកម្លោះដល់ថ្ងៃចូលរោងការ ហើយត្រូវរថយន្តបុកស្លាប់នោះ កើតនៅពេលកូនកម្លោះជិះម៉ូតូទៅដឹកមិត្តភក្តិអ្នកកំដរ ដើម្បីរៀបចំពិធីសូត្រមន្តចូលរោងការ នាល្ងាចថ្ងៃ១៧ ខែមករា ឆ្នាំ២០១៦។
បើតាមលោកអភិបាលស្រុកព្រៃនប់ ថ្លែងថា ក្រោយពីកូនកម្លោះរងគ្រោះឈ្មោះ ស្វាយ រឿន អាយុ ២៤ឆ្នាំ បានជួបហេតុការណ៍គ្រោះថ្នាក់ចរាចរណ៍ស្លាប់បាត់បង់ជីវិតនោះ មង្គលការដែលគ្រោងធ្វើផ្លូវការនៅថ្ងៃ១៨ ខែមករា ឆ្នាំ២០១៦ នៅភូមិតានៃឃុំជើងគោ ស្រុកព្រៃនប់ ខេត្តព្រះសីហនុ ក៏ត្រូវបានលុបចោល ហើយភាគីខាងកូនក្រមុំ ឈ្មោះ អ៊ីត ចាន់ អាយុ ២៤ឆ្នាំដូចគ្នា ក៏បានកែប្រែរោងអាពាហ៍ពិពាហ៍ ត្រឡប់ទៅជារោងបុណ្យសពឧទ្ទិសកុសលជូនទៅវិញ្ញាណក្ខន្ធកូនកម្លោះនោះវិញភ្លាមៗដែរ៕ ប្រភព៖ អគ្គស្នងការដ្ឋាននគរបាលជាតិ
