រាជរដ្ឋាភិបាល សម្រេចមិនយកពន្ធផ្លូវលើម៉ូតូ និងត្រីចក្រយានយន្ត នៅឆ្នាំ២០១៦
សារព័ត៌មាន Cambodia News/
ភ្នំពេញ (២១ តុលា ២០១៥) ៖ រាជរដ្ឋាភិបាល សម្រេចលុបចោល មិនយកពន្ធផ្លូវលើម៉ូតូ រ៉ឺម៉ក់ម៉ូតូ ត្រាក់ទ័រ គ្រឿងយន្ត និងទូកកាណូតធុនតូច នៅឆ្នាំ២០១៦។ការសម្រេចមិនយកពន្ធផ្លូវដូច្នេះ ត្រូវបានរាជរដ្ឋាភិបាល កំណត់នៅក្នុងសេចក្តីព្រាងច្បាប់ ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១៦ ឬច្បាប់ថវិកាជាតិឆ្នាំ២០១៦។
តាមសេចក្តីព្រាងច្បាប់ ស្តីពីហិរញ្ញវត្ថុសម្រាប់គ្រប់គ្រងឆ្នាំ២០១៦ ដែលគណៈរដ្ឋមន្រ្តី បានអនុម័តនៅថ្ងៃទី២១ ខែតុលា ឆ្នាំ២០១៥នេះ រាជរដ្ឋាភិបាលបានសម្រេចលុបចោលបា្រក់ពន្ធ ការយកពន្ធលើមធ្យោបាយដឹកជញ្ជូន និងយានជំនិះមួយចំនួនដូចខាងក្រោម ៖
-ទោចក្រយានយន្ត និងត្រីចក្រយានយន្ត ដើម្បីកាត់បន្ថយបន្ទុកចំណាយរបស់ប្រជាពលរដ្ឋ ដែលមានប្រាក់ចំណូលទាប
-ត្រាក់ទ័រ និងគ្រឿងយន្តប្រហាក់ប្រហែល ដើម្បីបន្តលើកស្ទួយដល់វិស័យកសិកម្ម ពិសេសដើម្បីលើកទឹកចិត្ត និងសម្រាលបន្ទុករបស់កសិករ
-ជលយានយន្តធុនតូច ដើម្បីកាត់បន្ថយបន្ទុកចំណាយរបស់ប្រជាពលរដ្ឋ ដែលប្រើប្រាស់ជលយានយន្តទាំងនោះ ជាមធ្យោបាយដឹកជញ្ជូន និងប្រកបអាជីវកម្មជាលក្ខណៈគ្រួសារ។
ក្នុងសេចក្តីព្រាងច្បាប់នោះ បានលើកឡើងថា ការលុបចោលពន្ធលើមធ្យោបាយដឹកជញ្ជូន និងយានជំនិះខាង លើ ធ្វើឲ្យរដ្ឋមានការបាត់បង់ចំណូល ចំនួន ៥.៨០១លានរៀល៕ ដោយ៖ ហេង នាង
