គណបក្សប្រជាជនកម្ពុជា បដិសេធករណីដកអសនៈ គណបក្សសង្គ្រោះជាតិពីសភា
ភ្នំពេញ អ្នកនាំពាក្យគណបក្សប្រជាជនកម្ពុជា នៅថ្ងៃសុក្រនេះ បដិសេធចំពោះការលើកឡើងថា គណបក្សកាន់អំណាច កំពុងចាត់វិធានការដកអាសនៈរបស់គណបក្សសង្គ្រោះជាតិ ដែលជាប់ឆ្នោតអាណត្តិទី៥នេះ ចំនួន៥៥អាសនៈដោយចាត់ទុកថាជាព័ត៌មានមិនពិត។
ក្នុងពិធីប្រគល់រង្វាន់ជ័យលាភីស្នាដៃសរសេរបទយការណ៍ ស្តីពីការប្រែប្រូលអាកាសធាតុ ដែលរៀបចំឡើងដោយមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ CCIM កាលពីព្រឹកថ្ងៃសុក្រ ទី២០ ខែធ្នូ ឆ្នាំ ២០១៣ នៅសណ្ឋាគារសាន់វេ លោក ខៀវ កាញារីទ្ធ អ្នកនាំពាក្យគណបក្សប្រជាជនកម្ពុជា និងជារដ្ឋមន្ត្រីក្រសួងព័ត៌មាន បានមានប្រសាសន៍ថា គណបក្សប្រជាជនកម្ពុជា មិនដែលមានបំណងដកអសនៈ របស់គណបក្សសង្គ្រោះជាតិពីសភានោះទេ។
លោកបន្តថា លើកលែងតែបក្សប្រឆាំងមួយនេះ ច្រានចោលមិនយកអាសនៈដែលខ្លួនមាន ដោយ គណបក្សសង្គ្រោះជាតិ គ្រាន់តែមិនចូលប្រជុំប៉ុណ្ណោះ ដូច្នេះមិនអាចដកបានទេ ហើយមានបញ្ហាអ្វីមានតែក្រុមប្រឹក្សាធម្មនុញ្ញទេ ដែលហ៊ានសម្រេចថាយ៉ាងណានោះ៕ Cambodia News