នាយករដ្ឋមន្ត្រី ហ៊ុន សែន ប្រតិកម្មនឹងអ្នកតំណាងរាស្ត្រគណបក្សសង្គ្រោះជាតិ
សារព័ត៌មាន Cambodia News/
ភ្នំពេញ (២០ តុលា ២០១៥) ៖ នៅក្នុងសម័យប្រជុំរដ្ឋសភា នាព្រឹកថ្ងៃ២០តុលានេះ លោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានបញ្ចេញប្រតិកម្មទៅនឹងអ្នកតំណាងរាស្ត្រគណបក្សសង្គ្រោះជាតិ យ៉ែម បុញ្ញឫទ្ធិ ដែលបង្ហោះសារក្នុងហ្វេសប៊ុក “អ្នកនយោបាយត្រូវហ៊ានបើកចិត្តឲ្យទូលាយ ទទួលការរិះគន់នានា”។
នាយករដ្ឋមន្ត្រី ហ៊ុន សែន បានមានប្រសាសន៍ ដោយសម្តីខ្លាំងៗ និយាយចំៗ និងលើកដៃចង្អុលទៅលោក យ៉ែម បុញ្ញឫទ្ធិ ដែលជាអ្នកតំណាងរាស្ត្រ និងជាប្រធានគណៈកម្មការមួយរូប កំពុងមានវត្តមានក្នុងកិច្ចប្រជុំរដ្ឋសភាដែរនោះថា “ខ្ញុំមិនដែលគម្រាមនរណាទេ។
ក៏ប៉ុន្តែសុំបើខឹងកុំលេង បើលេងកុំខឹង។ ឯកឧត្តម យ៉ែម បុញ្ញឫទ្ធិ! ឯកឧត្តម ប្រដៅខ្ញុំ នៅក្នុងហ្វេសប៊ុករបស់ឯកឧត្តម។ ប៉ុន្តែឯកឧត្តម កុំភ្លេចគិតថា មេរបស់ឯកឧត្តម ប្រមាថចំពោះរឿងក្នុងស្រុកទាំងមូល។ ឯកឧត្តម បែរជាប្រដៅខ្ញុំ ឲ្យខ្ញុំបើកចិត្តឲ្យទូលាយ។
យ៉ាងណាក៏ដោយ លោក យ៉ែម បុញ្ញឫទ្ធិ អ្នកតំណាងរាស្ត្រគណបក្សសង្គ្រោះជាតិ នៅពេលចេញពីកិច្ចប្រជុំរដ្ឋសភា បានថ្លែងទៅកាន់ក្រុមអ្នកកាសែតថា ក្នុងហ្វេសប៊ុករបស់លោក គឺលោកមិនបាននិយាយសំដៅលើបុគ្គលណាម្នាក់ទេ។ លោកគ្រាន់តែបញ្ជាក់នូវអ្វីដែលលោកសរសេរ គឺក្នុងផលប្រយោជន៍រួម និងផលប្រយោជន៍សម្រាប់ប្រជាពលរដ្ឋប៉ុណ្ណោះ។
សូមរម្លឹកថា លោក យ៉ែម បុញ្ញឫទ្ធិ អ្នកតំណាងរាស្ត្រគណបក្សសង្គ្រោះជាតិ បានសរសេរនិងបង្ហោះវិដេអូក្នុងហ្វេសប៊ុករបស់ខ្លួន កាលពីម្សិលមិញថា “អ្នកនយោបាយត្រូវហ៊ានបើកចិត្តទូលាយ ក្នុងការទទួលយកមតិរិះគន់ស្ថាបនា ពីគ្រប់មជ្ឈដ្ឋាន៕
