និស្សិតម្នាក់ ដែលគំរាមតាមហ្វេសប៊ុក បោកគ្រាប់បែកសម្លាប់សម្តេច ស ខេង ត្រូវបានប៉ូលិសចាប់ខ្លួន
សារព័ត៌មាន Cambodia News/
សៀមរាប (29 កញ្ញា 2015) ៖ ប៉ូលិស បានចាប់ខ្លួនជនសង្ស័យម្នាក់ ដែលបានគំរាមបោកគ្រាប់បែកសម្លាប់សម្ដេច ក្រឡាហោម ស ខេង នាយករដ្ឋមន្ត្រីស្តីទី និងជាឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ តាមប្រព័ន្ធបណ្ដាញទំនាក់ទំនងសង្គម (ហ្វេសប៊ុក) កាលពីថ្ងៃទី២៨ ខែកញ្ញា ឆ្នាំ២០១៥ នៅនៅសកលវិទ្យាល័យ សៅស៍អ៊ីសថ៍ អេសសៀ ស្ថិតនៅក្នុងខេត្តសៀមរាប។
ការចាប់ខ្លួន គឺបន្ទាប់ពីជនសង្ស័យរូបនេះ បានសរសេរនៅក្នុងគណនីហ្វេសប៊ុក ឈ្មោះ Savoeun Tao របស់ខ្លួន ដោយសសេរថា “ចាំសម្ដេចមកដល់ នាំគ្នាដាក់គ្រាប់បែក អោយងាប់ទាំងអស់គ្នាម្ដង”។
ការបង្ហោះ និង comment នេះ បានសរសេរ នៅថ្ងៃ២៦ ខែកញ្ញា ឆ្នាំ២០១៥។ ជនសង្ស័យ ដែលប៉ូលិសចាប់ខ្លួន មានឈ្មោះ តៅ សាវឿន ភេទប្រុស អាយុ ២៦ឆ្នាំ ជានិសិត្សរៀននៅសកលវិទ្យាល័យ សៅស៍អ៊ីសថ៍ អេសៀ រស់នៅភូមិបន្ទាយចាស់ សង្កាត់ស្លក្រាម ក្រុងសៀមរាប៕
