អ្នកភូមិបុរីកីឡាប្ដឹងមន្ត្រីសាលាខណ្ឌ ៧មករាពីបទស៊ីសំណូក
នៅថ្ងៃទី២០ កុម្ភៈ ២០១២ ប្រជាពលរដ្ឋបុរីកីឡាជាង ៧០នាក់បាននាំគ្នាឡើងទៅការិយាល័យអង្គភាពប្រឆាំងអំពើពុករលួយ ដើម្បីប្ដឹងមន្ត្រីសាលាខណ្ឌ ៧មករា ២រូប និងមន្ត្រីសហគមន៍បុរីកីឡា ៦នាក់ទៀត ពីបទស៊ីសំណូកបន្លំឈ្មោះប្រជាពលរដ្ឋបុរីកីឡា ដែលត្រូវទទួលផ្ទះល្វែងសង់ថ្មីពីក្រុមហ៊ុនផានអ៊ីមិច។
មានប្រជាពលរដ្ឋម្នាក់ក្នុងចំណោម ៧០នាក់ជាដើមបណ្ដឹង ដែលបានទៅដាក់ពាក្យបណ្ដឹងនោះបាននិយាយថា មន្ត្រីអង្គភាពប្រឆាំងអំពើពុករលួយម្នាក់ បានមកទទួលពាក្យបណ្ដឹង ដោយបានសន្យាថា អង្គភាពប្រឆាំងអំពើពុកនឹងស៊ើបអង្កេតបណ្ដឹងនេះ។
សូមបញ្ជាក់ថា ក្រុមហ៊ុនផានអ៊ីមិចបានទទួលសិទ្ធិពីរដ្ឋាភិបាលកម្ពុជា អភិវឌ្ឍន៍សំណង់នៅបុរីកីឡានៅនឹងកន្លែង ហើយបានចុះកិច្ចសន្យាសង់ផ្ទះល្វែងឲ្យអ្នកបុរីកីឡារស់នៅចំនួន ១០អាគារតែក្រុមហ៊ុនបានសង់តែ ៨អាគារ៕