លោកហ៊ុន សែន អំពាវនាវក្រុមហ៊ុនសាំង និងក្រុមហ៊ុនដឹកអ្នកដំណើរបញ្ចុះតម្លៃ
សារព័ត៌មាន Cambodia News/
ភ្នំពេញ (២៣ កញ្ញា ២០១៥) ៖ ក្នុងពិធីបិទសន្និបាទ ស្ដីពីការប្រលងប្រណាំងទីក្រុងស្អាត សេវាល្អឆ្នាំ២០១៤ ដែលរៀបចំដោយគណៈកម្មាធិការជាតិ វាយតម្លៃទីក្រុងស្អាត និងក្រសួងទេសចរណ៍ នៅសណ្ឋាគារសុខា ភ្នំពេញ នារសៀលថ្ងៃទី២២ កញ្ញា ឆ្នាំ២០១៥ លោកនាយករដ្ឋមន្ត្រី ហ៊ុន សែន បានអំពាវនាវឲ្យក្រុមហ៊ុនសាំងទាំងអស់ក្នុងប្រទេសបញ្ចុះតម្លៃសាំង។
លោកហ៊ុន សែន បានមានប្រសាសន៍ថា ប្រេងនៅលើពិភពលោកបានចុះថ្លៃហើយ ប៉ុន្តែបណ្ដាក្រុមហ៊ុននៅកម្ពុជាចុះយឺតពេក។ តែដល់ពេលតម្លៃប្រេងនៅក្រៅឡើងថ្លៃ ស្រាប់តែនៅភ្នំពេញឡើងដែរ។
ក្រៅពីមានប្រសាសន៍អំពាវនាវឲ្យបញ្ចុះតម្លៃប្រេងសាំង លោកនាយករដ្ឋមន្ត្រីក៏បានអំពាវនាវឲ្យក្រុមហ៊ុនដឹកអ្នកដំណើរទាំងអស់កុំតម្លើងថ្លៃឈ្នួលនាឱកាសពិធីបុណ្យភ្ជុំបិណ្ឌខាងមុខនេះ។
លោកបានមានប្រសាសន៍បន្ថែមថា ក្នុងស្មារតីគិតគូរដល់ប្រជាពលរដ្ឋ ជាពិសេសកម្មករ កម្មការិនី សិស្ស និស្សិត ដែលត្រូវធ្វើដំណើរត្រឡប់ទៅស្រុកកំណើតវិញគឺត្រូវចំនាយខ្ពស់ ខណៈដែលក្រុមហ៊ុនតម្លើងថ្លៃស្រេចតែចិត្ត។
យ៉ាងណាក៏ដោយ បើតាមការកត់សម្គាល់ ជារៀងរាល់ឆ្នាំឲ្យតែជិតដល់ឱកាសពិធីបុណ្យប្រពៃណីជាតិចូលមកដល់ ក្រុមហ៊ុនដឹកអ្នកដំណើរ ព្រមទាំងអ្នករត់តាក់ស៊ីមួយចំនួន បានចាប់ផ្ដើមតម្លើងថ្លៃឈ្នួលស្ទើរតែមួយទ្វេរជាពីរ។ តែទន្ទឹមនឹងនោះ ប្រមុខរដ្ឋាភិបាលក៏តែងតែអំពាវនាវឲ្យមានការបញ្ចុះតម្លៃជារៀងរាល់ឆ្នាំផងដែរ៕
