សមត្ថកិច្ចឃាត់សង្ឃ ២អង្គ ដែលលួចចេញក្រៅ វត្ដពេលយប់ ដើរផឹកស៊ី
ភ្នំពេញ៖ កាលពីថ្ងៃ ទី២៨ ខែវិច្ឆិកា លោកសង្ឃ២អង្គ ដែលគង់ នៅវត្ដសារាវ័ន្ដ ត្រូវបានកម្លាំងសមត្ថកិច្ច និងធម្មការខណ្ឌចំការមន ចាប់ផ្សឹកក្រោយ ពីលោកសង្ឃទាំង ២អង្គខាងលើនេះ បាន លបលួចចេញក្រៅវត្ដនៅពេលយប់ ហើយ ទៅដើរផឹកស៊ី ចូលច្រៀងខារ៉ាអូខេ។
ការឃាត់ខ្លួនសង្ឃទាំង ២ អង្គខាងលើនេះ ត្រូវឡើងខណៈដែលលោកសង្ឃទាំង ២អង្គ នាំគ្នាទៅផ្លាស់ប្ដូរសម្លៀកបំពាក់នៅ ក្បែររបងវត្ដទួលទំពូង ហើយក៏ត្រូវសមត្ថ កិច្ចឃើញ មានការសង្ស័យឃាត់ធ្វើការសួរ នាំទើបបែករឿង។
លោកសង្ឃទាំង ២អង្គ ដែលសមត្ថកិច្ច ឃាត់ខ្លួន ហើយផ្សឹកខាងលើនេះ ត្រូវបាន គេស្គាល់ឈ្មោះទី១ ចាន់ រតនា អាយុ ២៣ ឆ្នាំ ធ្លាប់បួសនៅវត្ដទួលប្រាសាទ ស្រុក រមាសហែក ខេត្ដស្វាយរៀង និងទី២ឈ្មោះ នុស សាយ័ន្ដ អាយុ ១៩ឆ្នាំ ធ្លាប់បួសនៅវត្ដ ឯករាជ្យ ស្រុកកំពង់ត្របែក ខេត្ដព្រៃវែង បច្ចុប្បន្នស្នាក់នៅក្នុងវត្ដសារាវ័ន្ដ ដែលមាន ទីតាំងស្ថិតនៅក្នុងសង្កាត់ជ័យជំនះ ខណ្ឌដូនពេញ។
បន្ទាប់ពីឃាត់ខ្លួនហើយ នៅព្រឹកថ្ងៃទី២៩ ខែវិច្ឆិកា មន្ដ្រីធម្មការ ខណ្ឌចំការមន បានធ្វើពិធីផ្សឹកដើម្បីឱ្យទៅ ជាគ្រហស្ថវិញ ហើយក៏បានដោះលែងដោយ មិនមានការចោទប្រកាន់អ្វីនោះទេ៕ ភ្នំពេញបច្ចុប្បន្ន