ក្រសួងសាធារណៈការគ្រោងដាក់ជញ្ជីងថ្លឹងទំងន់រថយន្ដនៅខាងកើតស្ពានអ្នកលឿង
សារព័ត៌មាន Cambodia News/
ភ្នំពេញ (០៧ ឧសភា ២០១៥) ៖ រដ្ឋមន្ដ្រីក្រសួងសាធារណៈការ និងដឹកជញ្ជូនលោកត្រាំ អ៊ីវតឹក បានជួបពិភាក្សាជាមួយឯកអគ្គរាជទូតជប៉ុនប្រចាំកម្ពុជា និងប្រធានទីភ្នាក់ងារJICAប្រចាំកម្ពុជា ចំពោះលទ្ធភាពក្នុងដាក់ជញ្ជីងថ្លឹងទំងន់រថយន្ដ នៅខាងកើតស្ពានអ្នកលឿង ឬហៅថាស្ពានត្សឹបាសា។ [ អានបន្ត ]
ការគិតគូរពីបញ្ហានេះ កើតឡើងក្រោយពីមានការព្រួយបារម្ភ ពីសាធារណៈជនមួយចំនួន ដែលសង្កេតឃើញថា មានរថយន្ដធំៗ បានបើកឆ្លងកាត់លើស្ពានអ្នកលឿង ហើយខ្លាចថា ដាក់លើសទំងន់បង្កឲ្យការប៉ះពាល់ ដល់ស្ពានវែងជាងគេនៅកម្ពុជាមួយនេះ។
លោកត្រាំ អ៊ីវតឹក រដ្ឋមន្ដ្រីក្រសួងសាធារណៈការ និងដឹកជញ្ជូន បានមានប្រសាសន៍ប្រាប់អ្នកសារព័ត៌មាន នៅព្រឹកថ្ងៃទី៧ ខែឧសភានេះ ថា នៅខាងលិចស្ពានត្សឹបាសា មានជញ្ជីងថ្លឹងទំងន់រថយន្ដរួចហើយ ប៉ុន្ដែនៅខាងកើតស្ពាននេះ នៅមិនទាន់មាននៅឡើយទេ។
ដូច្នេះជាវិធានការក្រសួង នឹងស្នើឲ្យភាគីជប៉ុនជួយសម្រួល ក្នុងការដាក់ជញ្ជីងនៅខាងកើតស្ពានមួយទៀត ដើម្បីកុំឲ្យមានរថយន្ដធំៗ ដាក់លើសទំងន់ ដែលនឹងអាចបង្កឲ្យមានការខូចខាត ឬប៉ះពាល់ ដល់ស្ពានអ្នកលឿង ឬហៅថាស្ពានត្សឹបាសានេះ៕
