សម្តេចតេជោ ណែនាំឲ្យរដ្ឋបាលរាជធានីបញ្ចេញមធ្យោបាយដឹកជញ្ជូនដឹកប្រជាពលរដ្ឋទៅស្រុកកំណើតក្នុងថ្ងៃភ្ជំបិណ្ឌ

សារព័ត៌មាន​ Cambodia News/

ភ្នំពេញ ៖ តាមរយៈសារសំឡេងពិសេសនៅព្រឹកថ្ងៃទី១២ ខែកញ្ញា ឆ្នាំ២០២២នេះ សម្តេច​អគ្គមហា​សេនាបតី​តេជោ​ ហ៊ុន សែន នាយករដ្ឋមន្ត្រីនៃព្រះរាជណាចក្រ​កម្ពុជា​ បានណែនាំ​ឲ្យ​រដ្ឋបាល​​រាជ​ធានី​ភ្នំពេញត្រៀម​មធ្យោ​បាយ​ដឹក​ជញ្ជូន​អ្នកដំណើរ​ដើម្បីដឹកពលរដ្ឋទៅកាន់ស្រុកកំណើតដោយមិន យកលុយនៅថ្ងៃបុណ្យភ្ជុំខាងមុខនេះ។

សម្តេចតេជោ ហ៊ុន សែន ក៏បានអំពាវនា​វ​ដល់ម្ចាស់​ក្រុមហ៊ុន​ដឹក​ជញ្ជូន​និង​ម្ចាស់​រថយន្ត​ឈ្នួល​នានា​សូម​កុំ​ដំឡើង​ថ្លៃក្នុង​ឱកាស​ដែល​បងប្អូនប្រជាពលរដ្ឋធ្វើ ដំណើរទៅមកស្រុកកំណើត ។

សម្តេចតេជោ ហ៊ុន សែន បានមានប្រសាសន៍ថា «ខ្ញុំអំពាវនាវចំពោះរថយន្តឈ្នួលទាំងឡាយសុំកុំឲ្យដំឡើងថ្លៃនៅ​ក្នុងរយៈ​ពេល​នៃការធ្វើបុណ្យ ដើម្បីប្រជា ជនមានលទ្ធ ភាពក្នុងការធ្វើដំណើរ ។ ​

ជាមួយគ្នានេះសម្តេចតេជោក៏សូមយកឱកាសនេះអំពាវនាវឲ្យសមត្តកិច្ចទាំងអស់យកចិត្តទុកដាក់ការពារសន្តិសុខឲ្យបានល្អបំផុតសម្រាប់ប្រជាជនដែលទៅតាមអារ៉ាមនានាក៏ដូចជាទៅកាន់មូលដ្ឋាននិង កន្លែងកម្សាន្តនានា ។

សូមជម្រាបថា យោងតាមសេចក្តីជូនដំណឹង របស់ក្រសួងការងារ និងបណ្តុះបណ្តាលវិជ្ជាជីវៈ ក្នុងឱកាស​ពិធីបុណ្យភ្ជុំបិណ្ឌ​ខាង​មុខ​នេះ កម្មករនិយោជិទាំង អស់ត្រូវបាន អនុញ្ញាតឲ្យឈប់សម្រាក ដោយមានប្រាក់ឈ្នួល រយៈពេល៣ថ្ងៃ គឺថ្ងៃទី ២៤, ២៥ និង ២៦ ខែកញ្ញា ឆ្នាំ២០២២៕

​