ម៉ាស៊ីនសម្រាប់បូជាសពអ្នកជំងឺកូវីដ-១៩បានមកដល់ទីតាំងឈាបនដ្ឋានហើយ
សារព័ត៌មាន Cambodia News/
កំពង់ស្ពឺ (១២ មេសា ២០២១) ៖ រដ្ឋបាលខេត្តកំពង់ស្ពឺបាននិងកំពុងរៀបចំទីតាំងដីមួយកន្លែងដែលមានទំហំ ១០ហិកតា ស្ថិតនៅក្នុងភូមិជាំ ឃុំតាសាល ស្រុកឱរ៉ាល់ ខេត្តកំពង់ស្ពឺ ដើម្បីធ្វើជាឈាបនដ្ឋានសម្រាប់បូជាសពអ្នកស្លាប់ដោយសារជំងឺកូវីដ-១៩ ខណៈដែលបណ្ដាញអគ្គិសនីកំពុងតភ្ជាប់។
លោក មួង ធី អភិបាលស្រុកឱរ៉ាល់ បានឲ្យដឹងនៅថ្ងៃទី១១ ខែមេសា ឆ្នាំ២០២១ ថា ចំពោះអគ្គិសនីក្រុមការងារបច្ចេកទេស បានរៀបចំរួចរាល់ហើយខណៈការឈូសឆាយដីព្រៃ ក៏បានរួចរាល់ហើយដែរ។
លោក អភិបាល បន្តថា ចំពោះសម្ភារបច្ចេកទេសគ្រឿងម៉ាស៊ីន (ឡដុត) ចំនួន ២គ្រឿង ដែលបានបញ្ជាទិញពីបរទេសនោះ ក៏បានបញ្ជូនមកដល់រួចរាល់ហេីយ កាលពីពេលថ្មីៗនេះ ប៉ុន្តែការចាប់ដំណើរការនៅពេលណានោះ នៅមិនទាន់ដឹងនៅឡេីយទេ តែអាចក្នុងពេលឆាប់ៗនេះ៕
