មុនការបោះឆ្នោតអាមេរិក លោកអូបាម៉ា និងហ៊ីលឡារីគ្លីនក្លាយជាគោលដៅនៃការបំផ្ទុះគ្រាប់បែក
សារព័ត៌មាន Cambodia News/
អាមេរិក (២៥ តុលា ២០១៨) ៖ អតីតប្រធានាធិបតីសហរដ្ឋអាមេរិក លោក បារ៉ាក់ អូបាម៉ា និងអតីតរដ្ឋមន្ត្រីការបរទេសលោកស្រី ហ៊ីលឡារី គ្លីនតុន និងសមាជិកជាន់ខ្ពស់នៃគណបក្សប្រជាធិបតេយ្យជាច្រើនទៀត រួមនឹងទីស្នាក់ការ CNN បានក្លាយជាគោលដៅនៃការបំផ្ទុះគ្រាប់បែក ដែលមន្រ្តីក្រុង New York បានចាត់ទុកសកម្មភាពទាំងនោះជាភេរវកម្ម។ នេះបើយោងតាមការចេញផ្សាយដោយសារព័ត៌មាន Channel News Asia ។
FBI បានអះអាងថា យ៉ាងហោចណាស់កញ្ចប់សង្ស័យចំនួន៥ ត្រូវបានស្ទាក់ចាប់បានមុនពេលបញ្ចូនដល់គោលដៅជាច្រើន ដែលរួមមានទាំងលោក Eric Holder អតីតរដ្ឋមន្រ្តីក្រសួងយុត្តិធម៌អាមេរិក និងលោក John Brennan អតីតភ្នាក់ងារស៊ើបការណ៍ CIA ប៉ុន្តែពុំមានកញ្ចប់ណាមួយបានផ្ទុះនោះទេ ហើយក៏ពុំមាននរណារងរបួសនោះដែរ។
ពេលនេះពុំទាន់មានក្រុមណាមួយចេញប្រកាសទទួលខុសត្រូវលើករណីនេះនៅឡើយទេ។ ប៉ុន្ដែព័ត៌មាននៃការគំរាមកំហែងនេះ បានបង្កើនភាពតានតឹងនៅក្នុងប្រទេសអាមេរិក មុនការបោះឆ្នោតពាក់កណ្ដាលអាណត្តិដែលនឹងធ្វើឡើងនៅថ្ងៃទី៦ ខែវិច្ឆិកា ឆ្នាំ២០១៨៕
