នាយករដ្ឋមន្ត្រី អនុញ្ញាតឲ្យពលរដ្ឋ ឆ្លងស្ពានជ្រោយចង្វាថ្មី រហូតដល់ថ្ងៃចប់ បុណ្យអុំទូក
សារព័ត៌មាន Cambodia News/
ភ្នំពេញ៖ ដើម្បីប្រជាពលរដ្ឋខ្មែរ ដែលធ្វើដំណើរមកចូលរួម យ៉ាងងាយស្រួលក្នុង ពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ជាប្រពៃណីខ្មែរខាងមុខនេះ លោក នាយករដ្ឋមន្ត្រី ហ៊ុន សែន បានអនុញ្ញាតឲ្យ ពលរដ្ឋទាំងអស់ អាចធ្វើដំណើរឆ្លងកាត់ ស្ពានជ្រោយចង្វាថ្មី រហូតដល់ចប់ បុណ្យអុំទូក។
ថ្លែងនៅក្នុងពិធី ចែក សញ្ញាបត្រដល់និសិ្សត របស់សាកលវិទ្យាល័យ ចំរើនពហុបច្ចេកវិទ្យា នៅមជ្ឈមណ្ឌលកោះពេជ្រ នាព្រឹកថ្ងៃព្រហស្បតិ៍ ទី២៥ ខែកញ្ញា ឆ្នាំ២០១៤ លោក នាយករដ្ឋមន្ត្រី ហ៊ុន សែន បានមានប្រសាសន៍ថា ចាប់ពីថ្ងៃនេះតទៅ អនុញ្ញាតឲ្យ ប្រពលរដ្ឋឆ្លងស្ពានថ្មី ជាបណ្តោះអាសន្ន ជាបន្តទៀត ប៉ុន្តែត្រូវ សាលារាជធានីភ្នំពេញ និងក្រសួងសាធារណការ និងដឹងជញ្ជូន ត្រូវធ្វើការជាមួយ ក្រុមហ៊ុនចិន រៀបចំឲ្យ ដំណើរការ ឲ្យបានស្រួល ដល់ថ្ងៃបុណ្យអុំទូក នៅថ្ងៃទី៥-៦-៧ ខែវិច្ឆិកា ឆ្នាំ២០១៤ ខាងមុខនេះ។
សូមបញ្ជាក់ថា ចាប់ពីថ្ងៃទី២១ ដល់ ២៥ កញ្ញា ឆ្នាំ២០១៤ ដើម្បីសម្រួលដល់ ការធ្វើដំណើរ របស់ ប្រជាពលរដ្ឋ ទៅចូលរួម ក្នុងពិធីបុណ្យកាន់បិណ្ឌ និងភ្ជុំបិណ្ឌ សាលារាជធានីភ្នំពេញ បានអនុញ្ញាត ឲ្យធ្វើដំណើរ លើស្ពានជ្រោយចង្វាថ្មី នេះរួចមកហើយ៕
