UNបង្ហាញការព្រួយបារម្ភពីបញ្ហាសិទ្ធិមនុស្សក្នុងប្រទេសថៃបច្ចុប្បន្ន
សារព័ត៌មាន Cambodia News/
ថៃ (០៤ កញ្ញា ២០១៤) ៖ ចាប់តាំងពីរបបយោធាលេចរូបរាងក្នុងប្រទេសថៃ ប្រជាជនថៃមួយចំនួនបានត្អូចត្អែថា ពួកគេគ្មានសិទ្ធិគ្រប់គ្រាន់ក្នុងការបញ្ចេញមតិឡើយ។ គ្មានសិទ្ធិត្រង់ថា រាល់ពេលមានការបើកវេទិការ ឬក៏ការជួបជុំផ្សេងៗត្រូវបានក្រុមកងទ័ពចុះអន្ដរាគន៍ និងហាមឃាត់សកម្មភាពរបស់ពួកគេ ហើយមានអ្នកខ្លះត្រូវបានចាប់ខ្លួនថែមទៀតផង។
អ្វីដែលគួរឱ្យកត់សម្គាល់ គឺរបបយោធាបានដាក់គំនាបលើប្រជាជនថៃដែលប្រឆាំងការធ្វើរដ្ឋប្រហារ ដោយមិនឱ្យធ្វើការផ្សព្វផ្សាយឬឃោសនាតាមប្រព័ន្ធផ្សព្វផ្សាយឡើយ ហើយបានគំរាមថាអ្នកណាដែលរកឃើញថាល្មើសនឹងការហាមឃាត់ នឹងត្រូវបញ្ជូនទៅកាត់ទោសនៅតុលាការយោធា។
ដោយមើលឃើញពីស្ថានភាពធ្ងន់ធ្ងរបែបនេះ អង្គការសហប្រជាជាតិបានបង្ហាញក្ដីព្រួយបារម្ភយ៉ាងខ្លាំង ពីបញ្ហាសិទ្ធិមនុស្សនៅប្រទេសថៃ។ ការិយាល័យសិទ្ធិមនុស្សអង្គការសហប្រជាជាតិ ប្រចាំតំបន់អាស៊ីអាគ្នេយ៍បានចង្អុលបង្ហាញបញ្ហា ទាក់ទងនឹងអ្នកការពារសិទ្ធិមនុស្សក្នុងប្រទេសថៃ ក្រោយពេលពួកគេលើកឡើងថា បានបញ្ឈប់ដំណើរការពីភាក្សាពីបញ្ហាយុត្ដិធម៌ក្នុងប្រទេសថៃក្រោយធ្វើរដ្ឋប្រហារ បន្ទាប់ពីរបបយោធាដាក់សម្ពាធ៕
