កម្មកររោងចក្រអូសេអង់ ព្រមានធ្វើបាតុកម្មទ្រង់ទ្រាយធំ
សារព័ត៌មាន Cambodia News/
ភ្នំពេញ (០៩ មិថុនា ២០១៤) ៖ នៅថ្ងៃទី០៩ មិថុនា នេះ កម្មកររោងចក្រអូសេអង់ជាង ១០០០នាក់ បានបន្តប្រមូលផ្តុំគ្នាធ្វើកូដកម្មនៅក្នុងរោងចក្រដោយរងចាំដំណោះស្រាយពីក្រសួងការងារ និងក្រសួងពាក់ព័ន្ធ ដែលពួកគេបានដាក់ញត្តិកាលពីថ្ងៃសុក្រ។
លោក ឆេង ឈាន់ តំណាងកម្មកររោងចក្រអូសេអង់ មានប្រសាសន៍ថា កម្មកររោងចក្រប្រមាណ ១៣០០នាក់ បានព្រមានធ្វើបាតុកម្មជាទ្រង់ទ្រាយធំ នៅថ្ងៃស្អែក បើក្រសួងការងារនៅមិនអាចដោះស្រាយពីបញ្ហា ដែលរោងចក្រព្យួរការងារកម្មករដោយមិនបានជូនដំណឹងជាមុនទេនោះ។
គូបញ្ជាក់ថា កម្មកររោងចក្រកាត់ដេរសម្លៀកបំពាក់អូសេអង់ (Ocean Garment) ដែលស្ថិតនៅភូមព្រៃទា សង្កាត់ចោមចៅ ខណ្ឌពោធិ៍សែនជ័យ ប្រមាណ១៣០០នាក់ បានធ្វើកូដកម្មនៅមុខរោងចក្រ តាំងពីថ្ងៃទី២៣ ខែឧសភាមក ក្រោយពេលដែលភាគីរោងចក្របានប្រកាសព្យួរការងារ ដោយសារគ្មានអ្នកបញ្ជាទិញ។
កម្មករបានទាមទារលក្ខខណ្ឌការងារចំនួនពីរចំណុច គឺទី១-ផ្តល់ប្រាក់ឈ្នួល១០០% ក្នុងកំឡុងពេលក្រុមហ៊ុនព្យួរការងាររយ:ពេល១ខែ ចាប់ពីថ្ងៃទី២៦ ខែឧសភា ដល់ថ្ងៃទី២៦ ខែមិថុនា ឆ្នាំ២០១៤ និងទី២- ក្រុមហ៊ុនត្រូវសងលុយដល់កម្មករវិញ ចំពោះកម្មករដែលក្រុមហ៊ុនបើកជូនមិនបានត្រឹមត្រូវ ប៉ុន្តែខាងភាគីក្រុមហ៊ុន ផ្តល់ប្រាក់សំណងត្រឹមតែ១៥ដុល្លារប៉ុណ្ណោះ៕
