សឿ សុធារ៉ា ទទួលរងការវាយប្រហារ
សារព័ត៌មាន Cambodia News/
ភ្នំពេញ (២៤ មេសា ២០១៤) ៖ តារាសម្ដែងស្រីល្បីឈ្មោះអ្នកនាង សឿ សុធារ៉ា បានទទួលរងនូវសម្ពាធវាយប្រហារយ៉ាងខ្លាំង ពីសំណាក់អ្នកតាមផ្ចាញ់ផ្ចាលនៅលើបណ្ដាញFacebook ប៉ុន្តែក្នុងពេលដំណឹងទាំងនោះ ស្ទើរតែលែងមានគេចាប់អារម្មណ៍ទៅហើយ ក្រុមមនុស្សអនាមិកទាំងនោះ បែរជាបង្កើនល្បឿនបង្ហោះចេញនូវរឿងមិនល្អរបស់អ្នកនាង។
តាំងពី មុនពិធីបុណ្យចូលឆ្នាំខ្មែរមក Profile Facebook អនាមិកមួយចំនួន បានបញ្ចេញនូវព័ត៌មានបង្ខូចឈ្មោះរបស់អ្នកនាងសឿ សុធារ៉ា កាន់តែខ្លាំង ព្រមជាមួយនឹងសំណេរបូញមាត់បត់ដើមដៃ ក្នុងន័យផ្ចាញ់ផ្ចាលអ្នកនាង បន្ទាប់ពីអ្នកនាងទើបនឹងត្រូវបងប្រុសស្លាប់ចោល។
ក្រុម មនុស្សអនាមិក បានឌីហ្សាញប្រយោគប្លែកៗ នៅលើរូបថតរបស់អ្នកនាង ហើយបង្ហោះចេញដដែលជាដដែល ជាមួយភាសាផ្ដន្ទាថា ក្នុងពេលដែលគ្រប់គ្នាដឹងថា អ្នកនាងទើបតែបាត់បងប្រុសជាទីស្រឡាញ់។
ពាក្យពេចន៍ ដែលបានឌីហ្សាញនោះ បានទាំងអមដោយពាក្យសម្ដីមាក់ងាយចំពោះអ្នកនាង និងត្រូវគេចែកចាយនៅលើបណ្ដាញFacebook ប្រមាណជាងកន្លះខែនេះទៀតផង។ នោះមិនមែនជាលើកទី១ទេ គឺស្ទើរជារឿងច្រំដែលទៅហើយ ពោលចាប់តាំងពីអ្នកនាង និងស្វាមីរមែងកោតសសើរចំពោះរដ្ឋាភិបាលនៅលើprofile facebook នោះតែម្ដង។
យ៉ាងណាមិញ គេនៅមិនទាន់ដឹងថា អ្នកប្រើ Profile ក្លែងក្លាយបង្ហោះព័ត៌មានផ្តន្ទា និងបង្ខូចឈ្មោះចំពោះអ្នកនាង នោះ គឺអ្នកណានៅឡើយទេ ដោយគ្រាន់តែមានការប៉ាន់ស្មានឃើញថា គឺជាអ្នកដែលមានគំនិតបញ្ច្រាស់ទិសជាមួយអ្នកនាងប៉ុណ្ណោះ៕
