រថយន្តក្រុង បុកជាមួយម៉ូតូ ឆាបឆេះទាំងស្រុងបណ្តាលឲ្យមនុស្ស ២នាក់ ស្លាប់
សារព័ត៌មាន Cambodia News/
ពោធិ៍សាត់ (១១ មេសា ២០១៤ ) ៖ កាលពីថ្ងៃទី១០ ខែមេសា នៅវេលាម៉ោង៤និង១០នាទី រថយន្តក្រុងមួយ បានឆាបឆេះទាំងស្រុង បន្ទាប់ពីបុកជាមួយម៉ូតូមួយគ្រឿង លើកំណាត់ផ្លូវជាតិលេខ៥ ក្នុងភូមិស្វាយសរ ឃុំស្នាអន្សារ ស្រុកក្រគរ ខេត្តពោធិ៍សាត់ បណ្តាលឲ្យមនុស្ស២នាក់ស្លាប់។
ពលរដ្ឋ រស់នៅខេត្តពោធិ៍សាត់ ដែលជាអ្នកឃើញហេតុការណ៍បានឲ្យដឹងថា រថយន្តក្រុង បានដឹកអ្នកដំណើរពីរាជធានីភ្នំពេញ តាមផ្លូវជាតិលេខ៥ ឆ្ពោះទៅកាន់ខេត្តបាត់ដំបង លុះដល់កន្លែងកើតហេតុ រថយន្តបានបុកម៉ូតូឆ្លងផ្លូវបណ្តាលឲ្យឆេះរថយន្ត និងម៉ូតូទាំងស្រុង ហើយអ្នកធ្វើដំណើរតាមម៉ូតូ២នាក់ បានស្លាប់។
ប្រភពព័ត៌មាន បានឲ្យដឹងទៀតថា ជនរងគ្រោះទីមួយ លោក ឆន សុខលី អាយុ២៧ឆ្នាំ និង ទីពីរ លោក ចាន់វុធ អាយុ២៨ឆ្នាំ ជិះម៉ូតូវីវ៉ាពណ៌ខ្មៅ។ ចំណែកអ្នកធ្វើដំណើរលើរថយន្តក្រុង មិនមានគ្រោះថ្នាក់អ្វីទេ ដោយបានរត់ចុះពីរថយន្តទាន់។ រថយន្តជារបស់ក្រុមហ៊ុនkso ស្លាកលេខភ្នំពេញ៣B៥៨០៦៕