គណៈកម្មការចំរុះ នៃគណបក្សទាំងពីរ បន្តជួបចរចាគ្នា នៅថ្ងៃទី២៤ មីនា
សារព័ត៌មាន Cambodia News/
ភ្នំពេញ(២២ មិនា ២០១៤)៖ នៅថ្ងៃទី២២ ខែមិនានេះមន្ត្រីជាន់ខ្ពស់គណបក្សប្រជាជនកម្ពុជា និងជាសមាជិកគណៈកម្មការចំរុះ នៃក្រុមចរចា ជាមួយគណបក្សសង្គ្រោះជាតិ បានលើកឡើងថា ជំនួបចរចា រវាងគណៈកម្មការចំរុះនៃ គណបក្សទាំងពីរ នឹងជួបពិភាក្សាគ្នា នៅថ្ងៃទី២៤ ខែមីនា ឆ្នាំ២០១៤ តាមការព្រមព្រៀងគ្នាជាធម្មតា ពុំមានអីប្រែប្រួលទេ។
លោក ជាម យៀប សមាជិកសភា និងជាសមាជិកគណៈកម្មការចំរុះនៃ គណបក្សប្រជាជនកម្ពុជា បានមានប្រសាសន៏ថា៖ ជំនួបចរចា រវាងគណបក្សប្រជាជនកម្ពុជា និងគណបក្សសង្គ្រោះជាតិ នៅថ្ងៃទី២៤ ខែមីនា ខាងមុខនេះ គឺនៅបន្តជួបពិភាក្សាជាមួយគ្នាជាធម្មតា ។
លោកបានបញ្ជាក់ថា៖ ជំនួបនៅថ្ងៃទី២៤ ខែមីនា នៅព្រឹទ្ធសភានោះ ក្រុមការងារនៃគណៈ កម្មការចំរុះ នៃគណបក្សទាំងពីរ នឹងពិភាក្សាគ្នាលើប្រធានបទ ការរៀបចំសិក្ខាសាលាថ្នាក់ជាតិ និងពិភាក្សាលើការរៀបចំវេទិកាសាធារណៈ ទាក់ទងទៅនឹងការធ្វើកំណែទម្រង់ស្ថាប័នបោះឆ្នោត គឺគណៈកម្មាធិការជាតិ រៀបចំការបោះឆ្នោត (គ.ជ.ប.) ដែលជាការព្រមព្រៀងគ្នា រវាងគណបក្សប្រជាជនកម្ពុជា និងគណបក្សសង្គ្រោះជាតិ ។
គណៈកម្មការចំរុះនៃ គណបក្សទាំងពីរ មានក្រុមការងារម្ខាងៗ ចំនួន៦រូប ។ គណបក្សប្រជាជនកម្ពុជា ដឹកនាំដោយ លោក ប៊ិន ឈិន ចំណែកគណបក្សសង្គ្រោះជាតិ ដឹកនាំដោយ លោក សុន ឆ័យ៕
