AZ ចំណាយជាង១០លានដុល្លារសម្រាប់ផ្លូវជាតិលេខ៤
អត្ថបទនិងរូប ដោយ ហេង នាង
ខេត្តកណ្តាល (២៨ មករា ២០១៤)៖ ដើម្បីសម្រេចបានការពង្រីកផ្លូវជាតិលេខ៤ឲ្យបានបួនជួរ (ទៅពីរ មកពីរ) ពីរង្វង់មូលចោមចៅទៅទីរួមខេត្តកំពង់ស្ពឺនៅបំណាច់ឆ្នាំ ២០១៤ នេះ ក្រុមហ៊ុន អេហ្សិត (AZ) បានចំណាយប្រាក់ជាង ១០ លានដុល្លារអាម៉េរិក សម្រាប់សម្ភារៈនិងការពង្រីក និងជួសជុលផ្លូវជាតិលេខនេះ។
លោក លឹម ស៊ីដេនីន រដ្ឋលេខាធិការក្រសួងសាធារណការនិងដឹកជញ្ជូនបានប្រាប់អ្នកសារព័ត៌មាននៅ ឯការដ្ឋានជួសជុលផ្លូវនៅផ្តុំថ្នល់ទទឹងក្នុងស្រុកអង្គស្នូលខេត្តកណ្តាល នាព្រឹកថ្ងៃទី ២៨ មករា នេះថា គ្រាន់តែនៅឆ្នាំ ២០១៤ នេះ ក្រុមហ៊ុន អេហ្សិត អ៊ិនវេសមិន បានចំណាយថវិការហូតដល់ទៅ ៧ លានដុល្លារអាម៉េរិក ដើម្បីជួសជុលថែទាំផ្លូវនិងការអ៊ុតបេតុងកៅស៊ូ បន្ថែមមួយស្រទាប់លើកំណាត់ផ្លូវមួយចំនួនប្រវែងប្រមាណ ៣៧ គីឡូម៉ែត្រ ពីភ្នំពេញទៅទីរួមខេត្តកំពង់ស្ពឺ។
លោកបានបន្តថា កាលពីប៉ុន្មានខែមុននេះ ក្រុមហ៊ុន អេហ្សិត ក៏បានចំណាយថវិកាប្រហែល ៤ លានដុល្លារអាម៉េរិកផ្សេងទៀត ដើម្បីតម្លើងរោងចក្របេតុងកៅស៊ូដោយខ្លួនឯងនៅខណ្ឌពោធិសែនជ័យ និងទិញម៉ាស៊ីនអ៊ុតផ្លូវ និងគ្រឿងចក្រថ្មីៗ សម្រាប់បម្រើការជួសជុលនិងថែទាំងផ្លូវជាតិលេខ៤នេះ។
លោក បានបញ្ជាក់ថា បើតាមការត្រួតពិនិត្យពីក្រុមការងារបច្ចេកទេសរបស់ក្រសួងសាធារណការ និងដឹកជញ្ជូនបានបង្ហាញថា ក្រុមហ៊ុនអេហ្សិតមានសមត្ថភាពគ្រប់គ្រាន់ទាំងធនធានមធ្យោបាយនិងធនធាន មនុស្ស ក៏ដូចជាធនធានបច្ចេកទេសក្នុងការអនុវត្តការងារទៅតាមកាតព្វកិច្ច របស់ខ្លួនទៅតាមកិច្ចសន្យា។
លោកបានបន្តថា នៅឆ្នាំ ២០១៤ នេះ បើទោះជាមិនមាននៅក្នុងកិច្ចសន្យាក៏ដោយ ក៏ក្រុមហ៊ុនបានប្តេជ្ញាពង្រីកតួផ្លូវពីឲ្យបាន៤ជួរ (ទៅពីរ-មកពីរ) ពីភ្នំពេញទៅខេត្តកំពង់ស្ពឺឲ្យហើយនៅបំណាច់ឆ្នាំ២០១៤ នេះ។
បើ តាមការឲ្យដឹងពីលោក ជួន វ៉ាន់ឌន នាយកចាត់ការទូទៅនៃក្រុមហ៊ុន អេហ្សិត អ៊ិនវេសមិន គឺថា បច្ចុប្បន្នក្រុមហ៊ុនសម្រេចបានប្រមាណ ៥០ ភាគរយហើយ។
លោកស្រី អ៊ុំ កន្យាណ មេឃុំតំណាក់អំពិល ស្រុកអង្គស្នូល បាននិយាយថា ការពង្រីកផ្លូវនេះពិតជាមានសារសំខាន់ណាស់គឺមិនត្រឹមតែ ប្រជាពលរដ្ឋនៅក្នុងឃុំរបស់លោកស្រីនោះទេ តែសម្រាប់អ្នកប្រើប្រាស់ដងផ្លូវជាតិលេខ៤ទាំងអស់។
លោក ស្រីបានបញ្ជាក់ថា មុនពង្រីកផ្លូវ គឺនៅផ្លូវកែងថ្នល់ទទឹងនេះតូចចង្អៀតដែលនាំឲ្យកកស្ទះចរាចរណ៍ ជារៀងរាល់ថ្ងៃ ប៉ុន្តែបន្ទាប់ពីផ្លូវនេះបានពង្រីកធំ ចរាចរណ៍មានភាពទូលាយ។ ទោះបីជាយ៉ាងនេះក្តី លោកស្រីបានអំពាវនាវដល់អ្នកធ្វើដំណើរទាំងអស់ឲ្យបើកបរ ប្រុងប្រយ័ត្ននិងគោរពតាមល្បឿនកំណត់ កុំអាងឲ្យតែផ្លូវធំទូលាយបើកបរលឿននោះ។
កំពុងត្រៀមចេញ ដំណើរតាមម៉ូតូសណ្តោងរទេះជាមួយភរិយាដើម្បីដឹកបាយសម្លរទៅលក់នៅឯ រោងចក្រកាត់ដេរមួយនៅតាមដងផ្លូវជាតិលេខ៤ សឿន ផល្លា អាយុ ២៧ ឆ្នាំ បាននិយាយថា នៅពេលផ្លូវធំទូលាយ ខ្លួនមានការងាយស្រួលក្នុងការបើកបរ ព្រោះកាលពីផ្លូវនៅតូច ទាំងឡានតូចនិងធំបានបើកគៀកៗនឹងម៉ូតូសណ្តោងរទេះរបស់គាត់ ដែលធ្វើឲ្យគាត់មានភាពភ័យខ្លាចចំពោះគ្រោះថ្នាក់ចរាចរណ៍។
រន់ វណ្ណី អាយុ ២៥ ឆ្នាំ ជាបើកបររថយន្តកុងទីណឺបាននិយាយថា ផ្លូវធំពិតជាល្អ ព្រោះវាទូលាយងាយបើកបរ និងស្រួលជៀសរថយន្តតូចៗនិងម៉ូតូ តែលោកបានទទូចឲ្យអ្នកបើកបរគ្រប់រូបត្រូវប្រុងប្រយ័ត្ន បន្ទាប់ពីមានផ្លូវធំទូលាយនោះ។
គួរបញ្ចាក់ថា នៅក្នុងកិច្ចសន្យារវាងក្រុមហ៊ុន អេហ្សិត អ៊ិនវេសមិន និងរាជរដ្ឋាភិបាលកម្ពុជា គឺក្រុមហ៊ុនត្រូវមើលការថែទាំនិងជួសជុលផ្លូវចាប់ពី រង្វង់មូលចោមចៅទៅខេត្តព្រះសីហនុក្នុងចម្ងាយផ្លូវ ២១៤ គីឡូម៉ែត្រ ហើយក្រុមហ៊ុនត្រូវបានផ្តល់សិទ្ធិក្នុងការប្រមូលកំរៃពីថយន្ត តូចធំដែលឆ្លងកាត់បញ្ជរផ្លូវជាតិនេះ។
ទោះបីជាយ៉ាងនេះក្តី ក៏រថយន្តដឹកកម្មករ រថយន្តសង្រ្គោះបន្ទាន់ រថយន្តអគ្គីភ័យ រថយន្តកាកបាទក្រហម រថយន្តកម្លាំងប្រដាប់អាវុធ និងរថយន្តក្បួនគណប្រតិភូ ព្រមទាំងរថយន្តរបស់អាជ្ញាធរដែនដីនៅតាមដងផ្លូវជាតិលេខ៤ មិនតម្រូវឲ្យបង់កំរៃឆ្លងកាត់នោះទេ។
សំ ស្រីពៅ កម្មការនីនៃរោងចក្រកាត់ដេរតាមដងផ្លូវជាតិលេខ៤បាននិយាយដោយទឹកមុខញឹមៗថា ដោយសារតែក្រុមហ៊ុនមិនឲ្យរថយន្តដឹកកម្មករបង់លុយនេះហើយ ទើបម្ចាស់រថយន្តមិនតម្លើងថ្លៃឈ្នួល ដែលចំណុចនេះជាការល្អសម្រាប់កម្មករ៕
- លោកស្រី អ៊ុំ កន្យាណ មេឃុំតំណាក់អំបិលស្រុកអង្គស្នូលថ្លែងប្រាប់អ្នកសារព័ត៌មាននៅថ្នល់ទទឹង នៅព្រឹកថ្ងៃទី ២៨ មករា ២០១៤ នាស្រុកអង្គស្នួល ខេត្តកណ្តាល។ រូប ហេងនាង
- សឿន ផល្លា អាយុ ២៧ ឆ្នាំ និងភរិយាត្រៀមចេញដំណើរតាមម៉ូតូសណ្តោងរទេះ ដើម្បីដឹកបាយសម្លរទៅលក់នៅឯរោងចក្រកាត់ដេរមួយនៅតាមដងផ្លូវ ជាតិលេខ៤នៅព្រឹកថ្ងៃទី ២៨ មករា ២០១៤ នាស្រុកអង្គស្នួល ខេត្តកណ្តាល។ រូប ហេងនាង
- រន់ វណ្ណី អាយុ ២៥ ឆ្នាំ ជាបើកបររថយន្តកុងទីណឺនៅតាមដងផ្លូវ ជាតិលេខ៤នៅព្រឹកថ្ងៃទី ២៨ មករា ២០១៤ នាស្រុកអង្គស្នួល ខេត្តកណ្តាល។ រូប ហេងនាង
- សកម្មភាពជួសជុលផ្លូវជាតិលេខ៤នាថ្ងៃទី ២៨ មករា ២០១៤។ រូប ហេងនាង
- សកម្មភាពជួសជុលផ្លូវជាតិលេខ៤នៅស្រុកអង្គស្នួលនៅថ្ងៃទី ២៨ មករា ២០១៤។ រូប ហេង នាង
- សកម្មភាពជួសជុលផ្លូវជាតិលេខ៤នៅស្រុកអង្គស្នួលនៅថ្ងៃទី ២៨ មករា ២០១៤។ រូប ហេង នាង
- សកម្មភាពជួសជុលផ្លូវជាតិលេខ៤នៅស្រុកអង្គស្នួលនៅថ្ងៃទី ២៨ មករា ២០១៤។ រូប ហេង នាង
- សកម្មភាពជួសជុលផ្លូវជាតិលេខ៤នៅស្រុកអង្គស្នួលនៅថ្ងៃទី ២៨ មករា ២០១៤។ រូប ហេង នាង
រថយន្តដឹកកម្មករឆ្លងកាត់បញ្ជរមិនត្រូវបានបង់ប្រាក់កំរៃទេ។ រូប ហេង នាង ថតនៅថ្ងៃទី ២៨ មករា ២០១៤
- រថយន្តកងទ័ពដឹកសម្ភារៈសិកឆ្លងកាត់បញ្ជរមិនត្រូវបានបង់ប្រាក់កំរៃទេ។ រូប ហេង នាង ថតនៅថ្ងៃទី ២៨ មករា ២០១៤
