ជនបិទមុខ មានក្រណាត់ក្រហម ដែលបង្ក្រាបក្រុមបាតុករមកពីស្ថាប័នណា?
សារព័ត៌មាន Cambodia News /
ភ្នំពេញ(២៣ មករា ២០១៤)៖ ស្ថាប័នរដ្ឋដែលមានភារកិច្ចក្នុងការរក្សាសន្តិសុខសណ្តាប់ធ្នាប់ ខ្លះអះអាងថា មិនស្គាល់ក្រុមជនប្រើមួកបិទមុខមានក្រណាត់ក្រហមជាសញ្ញាវាយ បំបែកបាតុករនៅដើមឆ្នាំ២០១៤នេះទេ ខណៈស្ថាប័នខ្លះទៀតគ្រាន់តែអះអាងថា អ្នកដែលរៀបចំសន្តិសុខសណ្តាប់ធ្នាប់ គឺសុទ្ធតែជាសមត្ថកិច្ច។
នៅ ដើមឆ្នាំ២០១៤នេះ មានលេចចេញក្រុមបិទមុខចម្លែក ដែលមិនមានឯកសណ្ឋានជាសមត្ថកិច្ច ប្រើវិទ្យុទាក់ទង ប្រើបួកសុវត្ថិភាពបិទមុខ ហើយមានដំបង ឬបំពង់ទីបចូលបំពេញការងារជាមួយសមត្ថកិច្ចក្នុងការរៀបចំ សណ្តាប់ធ្នាប់ ឬវាយពង្រាបលើបាតុករ។
ដោយសារក្រុមក្រណាត់ក្រហម ជាកម្លាំងថ្មី នាំឲ្យបាតុករ ប្រជាពលរដ្ឋក្នុង និងក្រៅប្រទេស មន្ត្រីសង្គមស៊ីវិល ក៏ដូចជាគណបក្សប្រឆាំងមានឆ្ងល់ជាច្រើនលើកឡើងជាបន្តបន្ទាប់ថា តើកម្លាំងនោះមកពីស្ថាប័នណា? ឆ្លងកាត់ការបណ្តុះបណ្តាលផ្នែកការពារសន្តិសុខសណ្តាប់ធ្នាប់ទេ? ហើយការប្រើកម្លាំងរបៀបនេះត្រឹមត្រូវតាមច្បាប់ឬអត់? ជាដើម។
អ្នកនាំពាក្យ សាលារាជធានីភ្នំពេញលោក ឡុង ឌីម៉ង់ ពេលសាកសួរពីប្រភពរបស់ក្រុមក្រណាត់ក្រហមនោះ លោកមិនបកស្រាយច្រើនទេ គ្រាន់តែបប្រាប់ថា មិនស្គាល់ មិនដឹងអ្វីទាំងអស់។ ចំណែកអ្នកនាំពាក្យក្រសួងមហាផ្ទៃជាក្រសួងដែលមានភារកិច្ចការពារ សន្តិសុខសណ្តាប់ធ្នាប់ទូទាំងប្រទេស លោក ខៀវ សុភ័គ ក៏ឆ្លើយថា មិនដឹងថា ក្រុមក្រណាត់ក្រហមមកពីណាដែរ។
ដោយសារតែក្រុមក្រណាត់ក្រហម នៅតែមិនដឹងពីប្រភពច្បាស់លាស់ មន្ត្រីសង្គមស៊ីវិលឃ្លាំមើលការរំលោភសិទ្ធិមនុស្ស បារម្ភថា ពេលក្រុមនោះបង្ហាញមុខងាយនឹងមានអំពើហិង្សាកើតឡើង៕
