កម្ពុជា នឹងដាក់ផែនទីបន្ថែមទៀតទៅកាន់តុលាការយុត្តិធម៌អន្តរជាតិ (ICJ)
Cambodia News
ភ្នំពេញ ៖ នៅព្រឹកថ្ងៃទី២៥ មេសា ២០១៣នេះ លោកឡុង វិសាលោ រដ្ឋលេខាធិការក្រសួងការបរទេសតំណាងឲ្យរាជរដ្ឋាភិបាលកម្ពុជាបានប្រាប់ក្រុមអ្នករាយការណ៍ព័ត៌មាននៅទីស្តីការក្រសួងការបរទេសកម្ពុជាថា កម្ពុជានឹងដាក់ផែនទីបន្ថែមទៀតទៅកាន់តុលាការយុត្តិធម៌អន្តរជាតិ (ICJ) នៅថ្ងៃទី២៦ មេសា ២០១៣ ទៅតាមសំណូមពររបស់ចៅក្រមនៃតុលាការយុត្តិធម៌អន្តរជាតិ ។
ការដាក់ផែនទីបន្ថែមនេះបន្ទាប់ពីចៅក្រមជនជាតិសូម៉ាលី១រូបនៃតុលាការយុត្តិធម៌អន្តរជាតិបានស្នើឲ្យ កម្ពុជា-ថៃ ដាក់ផែនទីបន្ថែមទៀតមកតុលាការហើយថា សវនាការនៅតុលាការ (ICJ) នោះ គឺកម្ពុជាសុំឲ្យមានការបកស្រាយឡើងវិញនូវសាលដីកាថ្ងៃទី១៥ មិថុនា ១៩៦២ ។ ចំណែកថៃនោះវិញ សុំមិនឲ្យបកស្រាយ ។
គួរបញ្ជាក់ថា តាមពាក្យបណ្តឹងរបស់កម្ពុជាតុលាការយុត្តិធម៌អន្តរជាតិបានបើកសវនាការ ផ្ទាល់មាត់កាលពីថ្ងៃទី១៥ ដល់ថ្ងៃទី១៩ មេសាកន្លងមកនេះ ។ បើតាមលោកឧបនាយករដ្ឋមន្រ្តី ហោ ណាំហុង រដ្ឋមន្រ្តីការបរទេស និងសហប្រតិបត្តិការអន្តរជាតិបានមានប្រសាសន៍ថា ថៃនៅតែបន្តលើកយកផែនទីដដែលៗដូចជាផែនទីទឹក ដែលថៃគូសជាឯកតោភាគីមកបង្ហាញនៅតុលាការយុត្តិធម៌អន្តរជាតិក្រុងឡាអេ ប៉ុន្តែតុលាការគេទាត់ចោល ហើយតុលាការលើកយកតែបញ្ហាអង្គហេតុ និងអង្គច្បាប់ប៉ុណ្ណោះ ក្នុងការដោះស្រាយទំនាស់ និងបកស្រាយនូវអត្ថន័យនៃវិសាលភាពសាលដីកាថ្ងៃទី១៥ មិថុនា ១៩៦២៕
