កម្មករប្រមាណជាង ៦ពាន់នាក់ ដង្ហែក្បួនស្វែងរកអន្តរាគមន៍ពីក្រសួងការងារ
ភ្នំពេញ៖ តាមមន្រ្តីសហជីព បានឲ្យដឹងថា នៅព្រឹកថ្ងៃទី២៧ ខែសីហា នេះ កម្មករមកពីរោងចក្រកាត់ដេរសម្លៀកបំពាក់យ៉ាងហោចណាស់ចំនួន៦ពាន់ នាក់ដែលមានទីតាំងស្ថិតនៅសង្កាត់បឹងទំពុន ខណ្ឌមានជ័យ នឹងធ្វើការដង្ហែក្បួនមកកាន់ក្រសួងការងារ ដើម្បីស្វែងរកអន្តរាគមន៍ ខណៈការតវ៉ានៅខាងមុខរោងចក្ររបស់ពួកគេត្រូវបរាជ័យ។
សូមបញ្ជាក់ថា ក្រុមកម្មករទាំងនោះបានធ្វើការតវ៉ាទាមទារនូវលក្ខខណ្ឌមួយចំនួន នៅខាងមុខរោងចក្រអស់រយៈពេល១០ថ្ងៃមកហើយ ដោយពេលខ្លះឈានទៅដល់ការបិទផ្លូវទៀត ប៉ុន្តែពួកគេមិនទទួលបានលទ្ធផល និងដំណោះស្រាយអ្វីពីរោងចក្រឡើយ។
ការទាមទាររបស់ក្រុមកម្មករនោះ គឺមានចំនួន១១ចំណុច ដូចជា ឲ្យក្រុមហ៊ុនបែងចែកវេនធ្វើការឲ្យបានត្រឹមត្រូវ ស្នើឲ្យដកកម្លាំងប្រដាប់អាវុធចេញពីបរិវេណក្រុមហ៊ុន និងការបើកប្រាក់ឈ្នួលឲ្យទៀងទាត់ជាដើម៕ នាង/Cambodia News
