សម្តេច ហ៊ុន សែន បកស្រាយជាថ្មីពីការសម្រេចផ្អាកបុណ្យអុំទូក
សារព័ត៌មាន Cambodia News/
ភ្នំពេញ (០៥ វិច្ចិការ ២០១៥ ) ៖ សម្តេចតេជោ ហ៊ុន សែន បានបញ្ជាក់ជាថ្មីទៀតថា ការសម្រេចផ្អាក មិនប្រារព្ធព្រះរាជពិធីបុណ្យអុំទូក នៅឆ្នាំនេះ គឺមកពីទឹកទន្លេ នៅមុខព្រះបរមរាជវាំង មានកម្រិតទាប ដែលសព្វថ្ងៃ នៅក្រោម ៥ ម៉ែត្រ មិនមែនដូចការលើកឡើងថា មកពីហេតុផលនយោបាយ ដែលរាជរដ្ឋាភិបាល ខ្លាចមានបាតុកម្មពីគណបក្សប្រឆាំងនោះទេ។
ការបញ្ជាក់ជាថ្មីរបស់សម្តេច ហ៊ុន សែន នេះ នៅក្នុងឱកាសពិធីបើកសម្ពោធដាក់ឲ្យប្រើប្រាស់ជាផ្លូវការគម្រោងការពារទឹកជំនន់ និងកែលម្អប្រព័ន្ធប្រឡាយលូ ក្នុងរាជធានីភ្នំពេញ ជំហ៊ានទី៣ នាព្រឹកថ្ងៃទី៥វិច្ឆិកា ដែលជាជំនួយថវិកា ដោយរាជរដ្ឋាភិបាលជប៉ុន តាមរយៈអង្គការ JICA នៅសួនច្បារមុខវត្តបទុមវតី។
សម្តេច ហ៊ុន សែន បន្តថា នៅឆ្នាំនេះ ដោយសារខេត្តមួយចំនួនមានទឹកកម្រិតទាប មិនអាចនាំទូកង មកចូលរួមពិធីនៅភ្នំពេញបានទេ ជាមួយគ្នានោះ ក៏មិនមានអ្នកអុំដែរ ព្រោះប្រជាពលរដ្ឋ ជាប់រវល់នឹងការធ្វើស្រែ ។ សម្តេចបញ្ជាក់ទៀតថា ថវិកាសម្រាប់រៀបចំព្រះរាជពិធីបុណ្យអុំទូក នឹងបង្វែទៅជាការទិញប្រេងវិញ សម្រាប់បូមទឹកសង្គ្រោះស្រូវរបស់ប្រជាកសិករ៕
