លោកស្រីយីងឡាក់ រត់គេចខ្លួនតាមទ្វារក្រោយខណៈបាតុករឡោមព័ន្ធការិយាល័យ
សារព័ត៌មាន Cambodia News /
ថៃ(២៣ មករា ២០១៤)៖ លោកស្រីយីងឡាក់នាយករដ្ឋមន្ត្រី ចាំផ្ទះ និងលោកឧបនាយករដ្ឋមន្ត្រី Surapong Tovichakchaikul ត្រូវបានរាយការណ៍ថា បានរត់គេចខ្លួន ទៅតាមទ្វារក្រោយ នៅក្នុងបរិវេណក្រសួងការពារជាតិ ខណៈក្រុមបាតុករមានគ្នាជាង៥០០នាក់ បានឡោមព័ន្ធក្រសួងនេះ។
សេចក្ដីរាយការណ៍របស់កាសែតថៃ The Nation បានឲ្យដឹងថានៅពេលនោះ លោកស្រី យីងឡាក់ ស្ថិតនៅក្នុងការិយាល័យរបស់លោកស្រី ដែលក្នុងឋានៈជា រដ្ឋមន្ត្រីក្រសួងការពារជាតិផង និងនាយករដ្ឋមន្ត្រីផងហើយ មួយរំពេចក្រុមបាតុករប្រឆាំងលោកស្រីបាន ធ្វើដំណើរមកដល់ ហើយភ្លាមៗ លោកស្រីត្រូវអង្គរក្ស ជួយការពារខ្លួន ហើយជម្លៀសចេញតាមទ្វារក្រោយក្រសួងដោយភាពភ័យខ្លាច។ បើទោះជាយ៉ាងណា លោកស្រី មិនរងរបួសស្នាមអ្វីនៅពេលនោះទេ។
The Nation បានបន្តថា លោកស្រីបានមកដល់ការិយាល័យ ក្រសួងការពារជាតិ នៅម៉ោង ៩:៤៥នាទីហើយ ត្រឡប់ទៅវិញភ្លាមដោយមិនបានជួបប្រជុំជាមួយ សមាជិករដ្ឋាភិបាលរបស់លោកស្រីឡើយ។
ក្រុមបាតុករបានអំពាវនាវ ឲ្យកងទ័ព កុំជួយរក្សាលោកស្រី ព្រោះថា លោកស្រីជាមេដឹកនាំម្នាក់អាយ៉ងលោកថាក់ស៊ិន។ គោលបំណងរបស់ក្រុមបាតុករ គឺមានផែនការចាប់លោកស្រី យីងឡាក់ ហើយបង្ខំឲ្យរំលាយគណៈរដ្ឋមន្ត្រី៕ ប្រែសម្រួលដោយ (DAP)