ពលកខ្មែរជាប់គុក និងត្រូវមេខ្សល់លក់បន្តពេលទៅធ្វើការនៅប្រទេសថៃ
ក្រុមស្ត្រីដែលរងនូវការជួញដូរពលកម្ម នៅភូមិស្វាយឫស្សី សង្កាត់បារាយណ៍ ក្រុងដូនកែវ បានឲ្យដឹងថា ពួកគាត់ទម្រាំគេចខ្លួនពីប្រទេសថៃ មកដល់ស្រុកខ្មែរ បានជួបការលំបាកខ្លាំង និងរត់គេចពីការជួញដូរបន្ត។
ស្ត្រី ឈ្មោះ សោម ចាន់ធូ រស់នៅសង្កាត់បារាយណ៍ បាននិយាយថា បានជាគាត់សម្រេចចិត្តចេញទៅធ្វើការនៅក្រៅប្រទេស ព្រោះគេថាតម្លៃឈ្នួលបានថ្លៃជាងធ្វើការនៅក្នុងស្រុកទើបគាត់សម្រេចចិត្តទៅធ្វើការតាមការអូសទាញរបស់មេខ្យល់។
ចាន់ធូ បានបន្តថា គាត់បានចាញ់បោកមេខ្យល់ ដែលរស់នៅភូមិត្រពាំងធំ ក្នុងក្រុងដូនកែវ មកបបួលយុវជនស្រីប្រុស ដែលគ្មានការងារធ្វើ ឲ្យទៅធ្វើការនៅប្រទេសថៃ ហើយមេខ្យល់នោះប្រាប់ថា ក្រុមហ៊ុនអេឡិចត្រូនិកនៅថៃ នឹងផ្តល់ប្រាក់ខែសម្រាប់ម្នាក់ក្នុង១ខែ គឺ១៣.០០០បាត ប្រាក់ថៃនឹងសន្យាថា ផ្តល់លិខិតឆ្លងដែនឲ្យគ្រប់គ្នា ពេលបានចូលទៅធ្វើការនៅប្រទេសថៃ ប៉ុន្តែពួកគាត់ត្រូវតម្រួតថៃ ចាប់ដាក់គុក និងមេខ្យល់នៅប្រទេសថៃ លក់បន្ត។
ស្ត្រីម្នាក់ទៀតឈ្មោះ សំឡូត រស់នៅភូមិស្វាយឫស្សី ដែរ បានឲ្យដឹងថា ពួកគាត់ក្លាយជាអ្នកទោស ព្រោះតែចង់ធ្វើការនៅប្រទេសថៃ ដែលល្បីថាបានប្រាក់ខែច្រើនជាងធ្វើការនៅក្នុងស្រុកខ្មែរ។ ប៉ុន្តែគាត់បានក្លាយទៅជាជនរងគ្រោះជាបន្តបន្តាប់។
លោក ម៉ែន ជឹម ចៅសង្កាត់បារាយណ៍ បានឲ្យដឹងថា បើគិតពីខែឧសភា ឆ្នាំ២០១២ ពលរដ្ឋក្នុងសង្កាត់នេះបានធ្វើចំណាកស្រុកជាង ១.៥២០នាក់ ក្នុងនោះ អ្នកចេញទៅបរទេសស្របច្បាប់ជាង ៥០០នាក់។ ពួកគេបានជួយឧបត្ថម្ភគ្រួសារវិញ ដូចជាសងបំណុលផ្សេងៗ សង់លំនៅថ្មី និងឲ្យគ្រួសារមានថវិកាចាយវាយ ប៉ុន្តែមានក្រុមយុវជនមួយចំនួនខ្លះមិនបានចេញទៅស្របច្បាប់ទេ ពួកគេចេញទៅតាមមេខ្យល់ ហើយលាក់លៀមមិនឲ្យអាជ្ញាធរដឹងឮទេ។
លោកបន្តថា ថ្មីៗនេះអាជ្ញាធរបានសុំឲ្យបុគ្គលិកក្រុមហ៊ុន ទូច ម៉ាណាក់ មែនផៅវ័រ សីបផ្លាយ (Touch Manak Manpower Supply) ដែលគ្មានទីតាំងនៅក្នុងខេត្តតាកែវ ហើយបានដើរទាក់ទាញពលរដ្ឋក្នុងមូលដ្ឋាននេះឲ្យទៅធ្វើការនៅបរទេស ហើយបានសុំឲ្យបុគ្គលិកក្រុមហ៊ុននោះ យកលិខិតបញ្ជាក់ និងច្បាប់អនុញ្ញាតពីរាជរដ្ឋាភិបាល ក្នុងការធ្វើអាជីវកម្មនាំពលករទៅបរទេសនោះ ព្រោះបង្ការខ្លាចពលរដ្ឋចាញ់បោកក្រុមហ៊ុនក្លែងក្លាយ៕
