រដ្ឋមន្ត្រីអប់រំ ចុះពិនិត្យការបូកស្រង់ និងផ្ទៀងផ្ទាត់ពិន្ទុប្រឡងបាក់ឌុប
សារព័ត៌មាន Cambodia News/
ភ្នំពេញ (០៩ កញ្ញា ២០១៥) ៖ លោកហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា នៅព្រឹកថ្ងៃទី០៩ ខែកញ្ញា បានអញ្ជើញចុះត្រួតពិនិត្យដំណើរការស្រង់ បូកពិន្ទុដោយកុំព្យូទ័រ ការត្រួតពិនិត្យ និងផ្ទៀងផ្ទាត់ពិន្ទុរបស់បេក្ខជន នៅការិយាល័យប្រឡងនាយកដ្ឋានមធ្យមសិក្សាចំណេះទូទៅ។
ក្នុងដំណើរចុះ ត្រួតពិនិត្យនេះ លោករដ្ឋមន្ត្រី បានជួបសំណេះសំណាល និងថ្លែងអំណរគុណដល់គណៈកម្មការ អនុគណៈកម្មការទាំងអស់ និងមន្ត្រីអង្គភាពប្រឆាំងអំពើពុករលួយ ដែលបានបំពេញការងារយ៉ាងយកចិត្តទុកដាក់ក្នុងស្មារតីទទួលខុសត្រូវខ្ពស់ ដោយរក្សានូវការសម្ងាត់ក្នុងរយៈពេលកន្លងមក។
គួរបញ្ជាក់ថា រហូតមកដល់ពេលនេះ ដំណើរការស្រង់ ផ្ទៀងផ្ទាត់ និងបូកពិន្ទុ សម្រេចបានប្រមាណជា៦០%ហើយ។ ការបូកស្រង់ និងផ្ទៀងផ្ទាត់ពិន្ទុនេះ នឹងត្រូវបញ្ចប់ នៅថ្ងៃទី១៣កញ្ញា។ បើតាមការវាយតម្លៃ របស់ក្រសួងអប់រំ ជាបឋម បានឲ្យដឹងថា លទ្ធផលរបស់បេក្ខជន ដែលបានធ្វើនៅលើសន្លឹកកិច្ចការប្រឡង ក្នុងឆ្នាំនេះ មានភាពល្អប្រសើរ និងវិជ្ជមានច្រើនជាងការប្រឡងកាលពីឆ្នាំ២០១៤៕
