ជំងឺផ្តាសាយបក្សី សម្លាប់កុមារម្នាក់ទៀត មកពីខេត្តកំពត
Cambodia News
កំពត៖ កាលពីថ្ងៃអង្គារ ទី០២ ខែកក្កដា ក្រសួងសុខាភិបាល និងអង្គការសុខភាពពិភពលោក បានឲ្យដឹងថា កាលពីថ្ងៃអាទិត្យសប្តាហ៍មុន កុមារីម្នាក់ទៀត អាយុ៦ឆ្នាំ មកពីខេត្តកំពត បានស្លាប់ ដោយសារជំងឺផ្តាសាយបក្សី (H5N1) ។
កុមារីម្នាក់នេះ ចាប់ផ្តើមឈឺចាប់ពីថ្ងៃទី២៤ ខែមិថុនា ឆ្នាំ២០១៣ ដោយមានគ្រុនក្តៅ និងឈឺក្បាល។ កុមារម្នាក់នេះ ត្រូវបានបញ្ជូនមកមន្ទីរពេទ្យគន្ធបុប្ផា ចាប់ពីថ្ងៃទី២៨ ខែមិថុនា ដោយទទួលបានការព្យាបាលជាមួយឱសថ Tamiflu។ កុមារីម្នាក់នេះ បានស្លាប់ កាលពីថ្ងៃទី២៨ខែមិថុនា។ ក្រសួងសុខាភិបាលកម្ពុជា បញ្ជាក់ថា កុមារីម្នាក់បានប៉ះពាល់ជាមួយបក្សីស្លាប់ នៅក្នុងភូមិ។
រដ្ឋមន្ត្រីក្រសួងសុខាភិបាល លោក ម៉ម ប៊ុនហេង មានប្រសាសន៍ថា ជំងឺផ្តាសាយបក្សី នៅតែបន្តគំរាមកំហែងដល់សុខភាពប្រជាពលរដ្ឋកម្ពុជា ហើយកុមារនៅតែមានភាពងាយរងគ្រោះច្រើន និងមានហានិភ័យខ្ពស់ ដោយសារពួកគេចូលចិត្តលេងកន្លែងដែលមានបក្សី។
នេះជាករណីជំងឺផ្តាសាយបក្សីទី១៣ ដែលបានកើតឡើងក្នុងឆ្នាំ២០១៣នេះ។ គួរបញ្ជាក់ថា ក្នុងឆ្នាំ២០១៣នេះ ជំងឺផ្តាសាយបក្សី បានសម្លាប់កុមារកម្ពុជា ចំនួន៩នាក់ ដែលរួមមានទាំងករណីចុងក្រោយនេះ៕
