សម្តេច ហ៊ុន សែន ស្នើធនាគារនិងស្ថាប័នមីក្រូហិរញ្ញវត្ថុបន្ថយការប្រាក់ពីប្រជាពលដ្ឋ
សារព័ត៌មាន Cambodia News/
ភ្នំពេញ (០៧ ធ្នូ ២០១៥) ៖ នៅព្រឹកថ្ងៃទី ០៧ ខែធ្នូ សម្តេច ហ៊ុន សែន បានសរសេរបង្ហោះក្នុងបណ្ដាញសង្គមហ្វេសប៊ុករបស់លោកថា កសិកម្មឆ្នាំនេះ ពិសេសដំណាំស្រូវទាំងស្រូវវស្សា ទាំងស្រូវប្រាំងបាន និងកំពុងប្រឈមនិងការខ្វះខាតទឹក។
សម្តេច ហ៊ុន សែន បានស្នើឲ្យស្ថាប័នហិរញ្ញវត្ថុ និងធនាគារ ត្រូវធ្វើការជាមួយស្ថាប័នមីក្រូហិរញ្ញវត្ថុ ដើម្បីរកវិធីអនុគ្រោះមួយចំនួនជូនប្រជាជនដែលរងគ្រោះធម្មជាតិ ដូចជាពន្យារពេលសង ឬពន្យារពេល សងដោយមិនយកការប្រាក់ ឬបន្ថយការប្រាក់ ដោយជៀសវាងការឆ្លៀតឱកាសរឹបអូសដីធ្លី ផ្ទះសម្បែង ទ្រព្យសម្បត្តិ ពីសំណាក់ម្ចាស់បំណុល ចំពោះកូនបំណុល ដែលកំពុងជួបការលំបាកដោយសារគ្រោះធម្មជាតិ ។
សូមបញ្ជាក់ថា ដោយសារតែទឹកទន្លេមេគង្គ ទឹកទន្លេសាប និងទឹកទន្លេបាសាក់ចតុមុខ នៅឆ្នាំនេះ មានកំពស់ទឹកទាបជាងឆ្នាំមុនៗ ថ្មីៗកន្លងទៅនេះ សម្តេច ហ៊ុន សែន ធ្លាប់ឲ្យមន្ត្រី និងក្រសួងស្ថាប័ន ដែលធ្វើការពាក់ព័ន្ធ ចុះជួយបូមទឹកដាក់អាងស្តុបទឹក ដើម្បីជួយដល់ប្រជាកសិករ ដែលរងផលប៉ះពាល់ពីគ្រោះរាំងស្ងួតនៅឆ្នាំនេះ។
សម្តេច ហ៊ុន សែន ក៍ធ្លាប់ឲ្យប្រជាពលរដ្ឋផ្ដល់ដំណឹងមកផ្ទាល់ តាមគេហទំព័របណ្ដាញសង្គមរបស់សម្តេច ប្រសិនបើមានការលំបាក ក្នុងការទំនាក់ទំនងទៅ កាន់អាជ្ញាធរមានសមត្ថកិច្ច សុំភ្ជាប់ឈ្មោះ លេខទូរស័ព្ទទំនាក់ទំនាក់ទំនង និងរូបភាពជាក់ស្តែងនៃទីតាំងនីមួយៗ និងចំនួនគ្រួសារដែលកំពុងរងគ្រោះ ប្រសិនបើអាចធ្វើបាន៕