សាលារាជធានីសន្យាជាថ្មី ដោះស្រាយបញ្ហាដីធ្លីអតីតអ្នកបុរីកីឡា
ភ្នំពេញ៖ នៅថ្ងៃទី៤ ខែធ្នូ នេះ មន្ត្រីសាលារាជធានីភ្នំពេញ បានសន្យាជាថ្មីថា នឹងដោះស្រាយបញ្ហាដីធ្លីឲ្យប្រជាសហគមន៍ ដែលជាអតីតបុរីកីឡា នៅសប្តាហ៍ក្រោយ។ ការសន្យាជាថ្មីនេះ ធ្វើឡើងបន្ទាប់ពីប្រជាសហគមន៍ប្រមាណជាង២០នាក់ ដែលជាអតីតបុរីកីឡា បានប្រមូលផ្តុំគ្នាជាថ្មីនៅមុខសាលារាជធានី ដើម្បីទាមទារដំណោះស្រាយតាមការសន្យាថារបស់មន្ត្រីស្ថាប័នមួយនេះ។
មន្ត្រីរដ្ឋបាលសាលារាជធានី លោក កើត ឆែ ហៅ តំណាងអតីតអ្នកបុរីកីឡា លោក ពេជ្រ លឹមឃួន ឲ្យទៅជួបចរចានៅព្រឹកថ្ងៃពុធនេះ បន្ទាប់ពីការចរចា លោកថា មន្ត្រីសាលារាជធានីបានសន្យាថា នឹងដោះស្រាយជូនសហគមន៍បុរីកីឡាជាង១០០គ្រួសារ ដែលនៅសេសសល់ពីការបណ្តេញចេញរបស់ក្រុមហ៊ុនផានអ៊ីម៉ិច នៅសប្តាហ៍ក្រោយ។
អតីតអ្នកបុរីកីឡា អះអាងថា ពួកគេ៤៥គ្រួសារក្នុងចំណោម ១០៧គ្រួសារ មិនទាន់បានទទួលសំណងពីក្រុមហ៊ុនផានអ៊ីម៉ិច ហើយកំពុងរស់នៅកន្លែងចាស់ ដែលពួកគាត់ធ្លាប់រស់នៅមុនពេលក្រុមហ៊ុន បានបណ្ដេញចេញកាលពីដើមឆ្នាំ២០១២៕ Cambodia News