ណាក់ ស្រីណា សម្រេចបំណង ដូចក្តីស្រមៃ
សារព័ត៌មាន Cambodia News/
ភ្នំពេញ(២២ មិនា ២០១៤) ៖ កញ្ញាណាក់ ស្រីណា ជាពិធីការិនីប្រចាំស្ថានីយទូរទស្សន៍អាស៊ីអាគ្នេយ៍ ដែលដុះដាលចេញពីកម្មវិធីប្រកួត«ពេជ្រកំពុងច្នៃ» ជាប់ជ័យលាភីលេខ ១ផ្នែកពិធីការិនីកាលពីឆ្នាំ២០១១ មានក្តីរីករាយជាខ្លាំងនៅពេលបានក្លាយជាពិធីការិនី សម្រេចតាម បំណងដែលនាងស្រមៃតាំងពីតូច ។
កញ្ញាណាក់ ស្រីណា ជាពិធីការិនីញញឹមស្រស់ និងមានរូបរាងតូចច្រឡឹង នាងមានប្រភពកំណើតនៅភូមផ្អាវ ស្រុកបាធាយ ខេត្តកំពង់ចាម និងមានបងប្អូនចំនួន ៥នាក់ ក្នុងនោះប្រុស៣នាក់ ចំណែកនាងជាកូនទី២ ។
អតីត សិស្សវិទ្យាល័យបាធាយ រូបនេះកាលពីតូចមានទឹកចិត្តស្រឡាញ់សិល្បៈ តែមិនដឹងត្រូវធ្វើបែបណា ព្រោះមិនទាន់មានឱកាស ។
ពេល រៀនចប់ថ្នាក់វិទ្យាល័យមករៀនបន្តនៅ ភ្នំពេញ ទើបកញ្ញាណាក់ ស្រីណា មានឱកាសដាក់ពាក្យចូលរួមប្រលងនៅស្ថានីយទូរទស្សន៍អាស៊ី អាគ្នេយ៍ ក្នុងកម្មវិធី «ពេជ្រកំពុងច្នៃ» ។ ក្នុងកម្មវិធីប្រលងនោះមានវិញ្ញាសាចម្រៀង ពិធីករ និងបង្ហាញម៉ូដ ហើយស្រីណា បានជ្រើសរើសវិញ្ញាសាពិធីករ ។
បច្ចុប្បន្ននេះកញ្ញាណាក់ ស្រីណា ជាពិធីការិនីក្នុងកម្មវិធី «វេទិកាអ្នកដឹកនាំធុរកិច្ច» កម្មវិធី «តន្ត្រីអាស៊ីអាគ្នេយ៍» កម្មវិធី«សហគ្រាសធុនតូចនិងមធ្យម» និងកម្មវិធី «សុខភាពយុវជន» ជាដើម ។ នៅក្រោយបុណ្យចូលឆ្នាំប្រពៃណីជាតិ មានកម្មវិធីថ្មីមួយទៀតសម្រាប់នាង ។ ក្រៅពីអាជីពជាពិធីការិនី កញ្ញាណាក់ ស្រីណា បានសម្តែងស្ប៉តឃោសនាឱ្យសហព័ន្ធសហភាពយុវជនកម្ពុជាស្តីពីកម្ម វិធី «អង្គរសង្ក្រាន្ត» ២ឆ្នាំជាប់គ្នា ។
ស្រីណាបញ្ជាក់ថា ពីដំបូងគេស្វែងរកអ្នកសម្តែងឈុតប្រចាំកម្មវិធីអង្គរសង្ក្រាន្ត ដែលមានទឹកមុខរម្យទមសមជានារី ខ្មែរ ។ គ្រានោះគេសួរនាំនាង តែនាងរារែកព្រោះខ្លាចសម្តែងមិនកើត ។ ដោយបានការជួយចង្អុលបង្ហាញពីក្រុមការងារសហព័ន្ធយុវជន ទើបនាងអាចសម្តែងបាន៕
