សភាប្រពៃណីអាហ្វហ្កានីស្ថានគាំទ្រឲ្យទ័ពអាមេរិកបន្តស្ថិតនៅក្រោយឆ្នាំ ២០១៤
នៅក្រោយ ជួបប្រជុំរយៈពេល៤ថ្ងៃ សភាបុរាណអាហ្វហ្កានីស្ថានឈ្មោះ Loya Jirga ដែលមានអ្នកតំណាងមកពីគ្រប់តំបន់នៅអាហ្វហ្កានីស្ថានចូលរួម បានប្រកាស កាលពីថ្ងៃអាទិត្យ គាំទ្រឲ្យមានកិច្ចព្រមព្រៀងទ្វេភាគីដើម្បីសន្តិសុខជាមួយអាមេរិក។ កិច្ចព្រមព្រៀងទ្វេភាគីដែលនឹងបើកផ្លូវឲ្យកងទ័ពអាមេរិកប្រមាណជាង មួយម៉ឺននាក់ នៅបន្តស្ថិតនៅក្នុងប្រទេសអាហ្វហ្កានីស្ថាន នៅក្រោយការដកទ័ពបរទេស នៅចុងឆ្នាំ ២០១៤។
ម្នាក់ម្តងៗ អ្នកតំណាងមកពីគណៈកម្មការចំនួន៥០នៃសភាបុរាណអាហ្វហ្កានីស្ថានបានឡើង សំដែងមតិគាំទ្រកិច្ចព្រមព្រៀងទ្វេភាគីដើម្បីសន្តិសុខជាមួយអាមេរិក។ ពួកគេបានជំរុញឲ្យរដ្ឋាភិបាលរបស់លោកអាមីដ កាហ្សៃចុះហត្ថលេខាបានឆាប់បំផុត ជាមួយអាមេរិក។ គំនិតនេះគឺមិនខុសពីការចង់បានរបស់ទីក្រុងវ៉ាស៊ីនតោន ដែលចង់ឲ្យកិច្ចព្រមព្រៀងសន្តិសុខជាមួយអាហ្វហ្កនីស្ថាន លេចចេញជារូបរាងនៅមុនដំណាច់ឆ្នាំ ២០១៣នេះ។
ប្រសិនបើអាហ្វហ្កានីស្ថានចុះកិច្ចព្រមព្រៀងទ្វេភាគីដើម្បី សន្តិសុខជាមួយអាមេរិក នោះ ទាហានអាមេរិកប្រមាណ១ម៉ឺន ៥ពាន់នាក់នឹងអាចបន្តស្ថិតនៅអាហ្វហ្កានីស្ថាន នៅ ក្រោយ ការដកកងទ័ពបរទេស នៅចុងឆ្នាំ ២០១៤។ បេសកកម្មរបស់ពួកគេគឺបន្តបណ្តុះបណ្តាលកងទ័ពអាហ្វហ្កានីស្ថាន និងប្រយុទ្ធប្រឆាំងនឹងក្រុមភេរវកម្ម នៅអាហ្វហ្កានីស្ថាន។
បើទោះបីជាមានការគាំទ្រពីសភាប្រពៃណី ប៉ុន្តែ កិច្ចព្រមព្រៀងទ្វេភាគីដើម្បីសន្តិសុខមិនងាយនឹងចេញជារូបរាងបាន ឆាប់ៗទេ។ កិច្ចព្រមព្រៀងត្រូវសភាបោះឆ្នោតទទួលស្គាល់ជាមុនសិន មុននឹងត្រូវលោកប្រធានាធិបតីចុះហត្ថលេខាដាក់ឲ្យប្រើប្រាស់។ លោក អាមីដ កាហ្សៃ ប្រធានាធិបតី អាហ្វហ្កានីស្ថាន ដែលពីដំបូងទីធ្លាប់បានបញ្ជាក់សារៈសំខាន់នៃកិច្ចព្រមព្រៀងសន្តិសុខ ជាមួយអាមេរិក បានអះអាងថា លោកមិនអាចចុះហត្ថលេខានៅមុនដាច់ឆ្នាំនេះទេ ដោយចាំឲ្យអ្នកស្នងតំណែងបន្តពីលោក នៅខែមេសាឆ្នាំក្រោយជាអ្នកចុះហត្ថលេខាវិញ។ ឬមួយក៏លោកទាមទារឲ្យអាមេរិកគោរពលក្ខខណ្ឌមួយចំនួនជាមុនសិន មុននឹងឲ្យលោកចុះហត្ថលេខា។ នោះគឺទ័ពអាមេរិកមិនត្រូវចូលឆែកឆេរក្នុងផ្ទះរបស់ប្រជាជន អាហ្វហ្កានីស្ថាន។ ទីពីរទៀត កងទ័ពអាមេរិកដែលប្រព្រឹត្តបទឧក្រិដ្ឋនៅអាហ្វហ្កានីស្ថាន ត្រូវកាត់ទោសដោយតុលាការអាមេរិកដែលស្ថិតនៅក្នុងមូលដ្ឋានទ័ពអាមេរិក នៅក្នុងទឹកដីអាហ្វហ្កានីស្ថាន។ នេះជាចំណុចរសើប ព្រោះនៅក្នុងរឿងនេះដែរ អាមេរិកបានសម្រេចដកទ័ពទាំងអស់ចេញពីអ៊ីរ៉ាក់ មិនទុកម្នាក់ បន្ទាប់ពីរដ្ឋាភិបាលអ៊ីរ៉ាក់បដិសេធមិនផ្តល់អភ័យឯកសិទ្ធិដល់ទាហាន អាមេរិកាំងដែលប្រព្រឹត្តបទល្មើសនៅក្នុងប្រទេសអ៊ីរ៉ាក់។ អាមេរិកបានទាមទាររួចហើយ ឲ្យមានអភ័យឯកសិទ្ធិសម្រាប់ទាហានរបស់ខ្លួន ដែលត្រូវបន្តស្ថិតនៅអាហ្វហ្កានីស្ថាន។
តាមអ្នកវិភាគ ការទាមទាររបស់លោកប្រធានាធិបតីអាមីដ កាហ្សៃ គ្រាន់តែជាលេសដែលលោកប្រើដើម្បីថែរក្សាមុខមាត់ កុំឲ្យគេរិះគន់ថា លោកខ្លាចអាមេរិក។ ប៉ុន្តែ តាមការពិតជាក់ស្តែង គឺលោកប្រធានាធិបតីអាហ្វហ្កានីស្ថានដែលជាអ្នកទទូចសុំឲ្យទ័ពអាមេរិក បន្តនៅអាហ្វហ្កានីស្ថាន។ សេតវិមានវិញព្រមានមិនផ្តល់ជំនួយយោធា ក្នុងករណីអាហ្វហ្កានីស្ថានខកខាន មិនអាចបោះឆ្នោតអនុម័តលើ កិច្ចព្រមព្រៀងនៅចុងឆ្នាំនេះ។
ក្រុមតាលីបង់ដែលត្រូវទ័ពបរទេស និងអាមេរិក បណ្តេញចេញពីអំណាច នៅអាហ្វហ្កានីស្ថាន នៅឆ្នាំ ២០០១ បានថ្កោលទោស កាលពីថ្ងៃអាទិត្យ លើការគាំទ្ររបស់សភាប្រពៃណីអាហ្វហ្កានីស្ថាន ដែលបើតាមពួកគេធ្វើឡើងដោយក្រុមមនុស្សដែលជួលដោយអាមេរិក ឬជាគ្នីគ្នារបស់រដ្ឋាភិបាលបច្ចុប្បន្ន។ នៅមុនពេលបើកសភា ប្រពៃណី Loya Jirga ពួកតាលីបង់ធ្លាប់បានគំរាមវាយប្រហារទៅលើក្រុមអ្នកតំណាងសភាណា ដែលបោះឆ្នោតគាំទ្រឲ្យមានកិច្ចព្រមព្រៀងសន្តិសុខជាមួយអាមេរិក៕ ដោយ ឈាង បុប្ផា (RFI)